పనిచేయరా.. వెళ్లిపోండి!

సమస్య చెబితే పరిష్కరించాలి.. ప్రజలను ఇబ్బంది పెడితే సహించేది లేదు

రామన్నపేట, సెప్టెంబర్ 26 స్థానికం ప్రతినిధి :

అధికారులు, ప్రజాప్రతినిధులు సమన్వయంతో పనిచేస్తేనే గ్రామాల్లో సమస్యలు పరిష్కారం అవుతాయని ప్రభుత్వ విప్ నకిరేకల్ ఎమ్మెల్యే వేముల వీరేశం అన్నారు. శనివారం మండలపరిషత్ కార్యాలయంలో జరిగిన మండల స్థాయి సమీక్ష సమావేశానికి ఆయన హాజరై మాట్లాడారు. సర్పంచ్లు తమ గ్రామాల్లో నెల కొని ఉన్న సమస్యలు రోడ్లు గుంతల మయంగా మారడంతో పై అధికారుల దృష్టికి ఎందుకు తీసుకెళ్లలేదని ఆర్ ఆండ్ బీ ఏఈ నవీన్ పై ఎమ్మెల్యే ఆగ్రహం వ్యక్తం చేశారు. ప్రజలు ఇబ్బంది పడుతుంటే ఏం చేస్తున్నావు! పని చేతకాకపోతే వెళ్లిపో అంటూ ఆగ్రహం వ్యక్తం చేశారు. అధికారులు ప్రజా ప్రతినిధులు సమన్వయంతో పనిచేస్తూ సమస్యలను ఎప్పటికప్పుడు పై అధికారుల దృష్టికి తమ దృష్టికి తీసుకురావలన్నారు. టెండర్ల ప్రక్రియ పూర్తి అయ్యే వరకు యుద్ధ ప్రాతి పొదికన రామన్నపేట- అమ్మనబోలు రోడ్డు మరమత్తులు చేపడతామన్నారు.

ప్రజల్లోకి వెళ్లి సమస్యలు తెలుసుకోండి

ప్రజలు సమస్యలను అధికారుల దృష్టికి తీసుకువచ్చినప్పుడు కార్యాలయాల్లో కూర్చొని వివరాలు తెలుసుకోవడం కాకుండా క్షేత్రస్థాయిలోకి వెళ్లి సమస్యను పూర్తిగా పరిశీలించాలని ఎమ్మెల్యే సూచించారు. సమస్యపై పూర్తి అవగాహన పెంచుకుని, పరిష్కారానికి అవసరమైన చర్యలు చేపట్టాలని ఆదేశించారు. ప్రజాప్రతినిధులు తమ ప్రాంతంలోని సమస్యలను అధికారుల, ప్రభుత్వ దృష్టికి తీసుకెళ్లి పరిష్కారానికి ప్రణాళికలు రూపొందించాలని సూచించారు.

ఇరిగేషన్‌ అధికారులపై ఫైర్‌

కాల్వల సమస్యలపై సమీక్ష సందర్భంగా ఇరిగేషన్‌ అధికారుల తీరుపై ఎమ్మెల్యే ఆగ్రహం వ్యక్తం చేశారు. ప్రజలు చెబుతున్న సమస్యలను క్షేత్రస్థాయిలో పరిశీలించి వాస్తవ పరిస్థితులను తెలుసుకోవాలని సూచించారు. ప్రజల సమస్యపై అధికారులకు పూర్తి అవగాహన ఉండాలి.. పరిష్కారం చూపే బాధ్యత కూడా అధికారులదే అని స్పష్టం చేశారు.ధర్మారెడ్డిపల్లి, పిల్లాయిపల్లి కాల్వల పనులను పూర్తి చేసి కక్కిరేణి, ఇస్కిల్లా గ్రామాలకు ప్రయోజనం కల్పిస్తామని తెలిపారు

రోడ్లకు మహర్దశ

మండలంలోని రోడ్లపై ఉన్న గుంతలను త్వరితగతిన పూడ్చాలని ఎమ్మెల్యే ఆదేశించారు. అమన బోలు–రామన్నపేట రోడ్డు పనులకు టెండర్లు, అగ్రిమెంట్‌ ప్రక్రియ పూర్తి చేసి త్వరలో పనులు ప్రారంభిస్తామని తెలిపారు. జనంపల్లి–కక్కిరేణి పంచాయతీరాజ్‌ రహదారి నిర్మాణానికి చర్యలు తీసుకుంటామని చెప్పారు. నాలుగు లైన్ల రహదారి పనులు కూడా త్వరలో ప్రారంభమవుతాయని వెల్లడించారు.

ఈ కార్యక్రమంలో మండల ప్రత్యేక అధికారి రాఘవరెడ్డి, ఎంపీడీఓ ఆవుల రాములు, తహసీల్దార్ లాల్ బహుదూర్, మార్కెట్ కమిటీ వైస్ చైర్మన్ సిరిగిరెడ్డి మల్లారెడ్డి వివిధ గ్రామాల సర్పంచ్లు, మండలస్థాయి అధికారులు పాల్గొన్నారు.