మహారాష్ట్రలోనినాగపూర్‌లోని ఆఫీసర్స్ ట్రైనింగ్ అకాడమీ (OTA)లో జనవరి 5 నుంచి ఏప్రిల్ 4 వరకు జరిగిన మూడు నెలల కఠిన సైనిక శిక్షణను విజయవంతంగా పూర్తి చేసి, నేషనల్ కేడెట్ కార్ప్స్ (NCC) లో అసోసియేట్ NCC ఆఫీసర్ (ANO) హోదాతో లెఫ్టినెంట్ర్యాంక్‌ను పొందిన చిలుముల సుధాకర్, నాగార్జున ప్రభుత్వ కళాశాలకు గర్వకారణంగా నిలిచారు. ఆయన ప్రస్తుతం కళాశాలలో ఇంగ్లీష్ అసిస్టెంట్ప్రొఫెసర్‌గా విద్యారంగంలో పనిచేస్తూనే, OTAలో జరిగిన తీవ్రమైన ఆర్మీ శిక్షణతో సైనిక అధికారిగా కూడా అవగాహన పెంచుకున్నారు.

శిక్షణ కార్యక్రమంలో ఫైరింగ్, ఆయుధాల హ్యాండ్లింగ్, ఫీల్డ్ క్రాఫ్ట్, డ్రిల్, ఫిజికల్ ట్రైనింగ్, నాయకత్వ లక్షణాల అభివృద్ధి వంటి అంశాలపై ప్రాథమిక, నైపుణ్యపూరిత శిక్షణ పొందారు. అలాగే, NCC క్యాడెట్లను భారత సైన్యంలో చేరేందుకు ప్రోత్సహించడం, వారికి అవసరమైన మార్గదర్శకత్వం అందించడం, NCC యొక్క సైనిక జీవన విధానం, శిస్తు, సామూహిక అనుశాసన వంటి అంశాలపై కూడా ప్రత్యేక శిక్షణ పొందారు.శిక్షణ పూర్తయిన తర్వాత లెఫ్టినెంట్ ర్యాంక్‌తో నియమితులైన చిలుముల సుధాకర్, NCC క్యాడెట్లకు శారీరక దృఢత్వం, డ్రిల్, క్రమశిక్షణ, ఆయుధ వినియోగం, ఫైరింగ్ శిక్షణ (Weapon Training & Firing), ఫీల్డ్ క్రాఫ్ట్, మ్యాప్ రీడింగ్, సివిల్ డిఫెన్స్, విపత్తు నిర్వహణ, నాయకత్వ లక్షణాలు, సామాజిక సేవా కార్యక్రమాలు వంటి సమగ్ర శిక్షణ ఇవ్వడంతోపాటు, దేశభక్తి, జాతీయ సమగ్రత వంటి అంశాలపై ప్రత్యేక దృష్టి పెట్టనున్నారు. అదనంగా, ఆర్మీలో చేరడానికి అవసరమైన అవగాహన, ఇంటర్వ్యూ సంసిద్ధత, వ్యక్తిత్వ వికాసం వంటి అంశాలపై కూడా క్యాడెట్లకు మార్గదర్శకం అందిస్తారు. ఈ ద్వారా వారిని ఉత్తమ పౌరులుగా, భవిష్యత్ రక్షణ సిబ్బందిగా రూపుదిద్దాలని ఆయన లక్ష్యంగా పెట్టుకున్నారు.

ఈ సందర్భంగా కళాశాల ప్రిన్సిపాల్ డా. సముద్రాల ఉపేందర్, అకాడమిక్ కోఆర్డినేటర్ బత్తిని నాగరాజు, అంతర్గత నాణ్యతా వైస్ ప్రిన్సిపాల్స్ డా. పరంగి రవికుమార్, ప్రొఫెసర్ అంతటి శ్రీనివాసులు, పరీక్షల నియంత్రణాధికారి డా. డి. మునిస్వామి, తెలుగు శాఖ అధ్యక్షులు డా. వెల్దండి శ్రీధర్, వివిధ విభాగాల అధ్యక్షులు డా. ఎ. మల్లేశం, డా. జ్యోత్స్న, శివరాణి తదితర అధ్యాపకులు చిలుముల సుధాకర్‌ను హృదయపూర్వకంగా అభినందించారు. ఆయన భవిష్యత్తులో ఇంకా ఎత్తులు అధిరోహించాలని, విద్యార్థులకు, NCC క్యాడెట్లకు మార్గదర్శకుడిగా మరింత సేవ చేసేలా ఆకాంక్షించారు.