రామన్నపేట, సెప్టెంబర్ 24: స్థానిక ప్రభుత్వ డిగ్రీ కళాశాల యువ టూరిజం క్లబ్ ఆధ్వర్యంలో విద్యార్థులు ప్రాచీన సామ్రాజ్య రాజధాని ఇంద్రపాలనగరాన్ని సందర్శించారు. క్రీస్తుశకం నాలుగో శతాబ్దంలో ఎంతో వైభవంగా వెలుగొందిన ఇంద్రపాలనగరంలోని చారిత్రక కట్టడాలు, శిథిలాలను విద్యార్థులు పరిశీలించి నాటి చరిత్ర, సంస్కృతి, పాలనా విధానాలపై అవగాహన పొందారు.

ఈ సందర్భంగా ప్రముఖ సాహితీవేత్త, తెలుగు శాఖ అధ్యక్షులు డాక్టర్ తండు కృష్ణ కౌండిన్య మాట్లాడుతూ తెలంగాణతో పాటు దేశవ్యాప్తంగా ఉన్న చారిత్రక కట్టడాలు, ప్రముఖ పర్యాటక ప్రదేశాలను విద్యార్థులు సందర్శించాలని సూచించారు. ఆయా ప్రాంతాల చరిత్ర, గత పాలకుల వైభవం, పరిపాలనా విధానాలు, ప్రజల సంస్కృతి, భౌగోళిక పరిస్థితులను ప్రత్యక్షంగా అధ్యయనం చేయడం ద్వారా విద్యార్థులకు మరింత అవగాహన కలుగుతుందన్నారు.

యువ టూరిజం క్లబ్ కోఆర్డినేటర్ డాక్టర్ డి. కిషన్ మాట్లాడుతూ చారిత్రక కట్టడాలను పరిరక్షించి, మరింత అభివృద్ధి చేసి భావితరాలకు అందించాల్సిన బాధ్యత నేటి పాలకులపై ఉందన్నారు. విష్ణుకుండినుల రాజధానిగా ఉన్న ఇంద్రపాలనగరంలోని శిథిల కట్టడాలు నాటి వైభవాన్ని గుర్తు చేస్తున్నాయని తెలిపారు. పురావస్తు శాఖ ఈ ప్రాంతాన్ని గుర్తించి పర్యాటక కేంద్రంగా అభివృద్ధి చేయాల్సిన అవసరం ఉందన్నారు.

కార్యక్రమంలో కళాశాల పరిపాలనాధికారి జి. కరుణాకర్, అధ్యాపకులు అమర్, నరేష్, రాంబాబు, కిరణ్‌తో పాటు విద్యార్థులు పాల్గొన్నారు.