జూబ్లీహిల్స్‌లో డ్రంక్ అండ్ డ్రైవ్‌లో చిక్కిన వ్యక్తి కారులో ఆటోమేటిక్ నెంబర్ ప్లేట్ మార్పిడి వ్యవస్థ బయటపడింది.

హైదరాబాద్ నగరంలోని జూబ్లీహిల్స్ ప్రాంతంలో నిర్వహించిన డ్రంక్ అండ్ డ్రైవ్ తనిఖీలలో ట్రాఫిక్ పోలీసులు ఆశ్చర్యానికి గురయ్యే ఘటన వెలుగులోకి వచ్చింది. మద్యం సేవించి వాహనం నడుపుతున్న ఓ వ్యక్తిని అదుపులోకి తీసుకున్న పోలీసులు, అతని కారును పరిశీలించగా సంచలన విషయాలు బయటపడ్డాయి.

సాధారణంగా కనిపించిన ఆ లగ్జరీ కారులో ప్రత్యేకంగా అమర్చిన హైటెక్ సిస్టమ్ పోలీసులను కంగుతినిపించింది. ఒక బటన్ నొక్కగానే వాహన నెంబర్ ప్లేట్ స్వయంచాలకంగా మారిపోవడం గమనించిన అధికారులు షాక్‌కు గురయ్యారు. క్షణాల్లోనే తెలంగాణ నెంబర్ ప్లేట్ ఢిల్లీ నెంబర్‌గా, మరికొన్ని సెకన్లలో మళ్లీ మారిపోతుండటంతో ఇది ముందస్తుగా పన్నిన కుట్రగా భావిస్తున్నారు.ఈ సాంకేతిక మార్పిడి వ్యవస్థ ద్వారా ట్రాఫిక్ చలాన్లు తప్పించుకోవడం, నేరాలకు పాల్పడి గుర్తింపు తప్పించుకోవడం లక్ష్యంగా ఈ పద్ధతిని ఉపయోగిస్తున్నట్టు అనుమానాలువ్యక్తమవుతున్నాయి. పోలీసులు వెంటనే ఆ వ్యక్తిని అదుపులోకి తీసుకుని వాహనాన్ని స్వాధీనం చేసుకున్నారు.ప్రాథమిక విచారణలో అతను పలుమార్లు నెంబర్ ప్లేట్లు మార్చుతూ ట్రాఫిక్ నియమాలను ఉల్లంఘించినట్లు తేలినట్టు సమాచారం. ఈ ఘటనపై మరింత లోతుగా దర్యాప్తు చేపట్టిన ట్రాఫిక్ పోలీసులు, ఇలాంటి హైటెక్ మోసాలకు పాల్పడుతున్న గ్యాంగ్ ఉన్నదా అనే కోణంలో విచారణ కొనసాగిస్తున్నారు.

నగరంలో సాంకేతికతను దుర్వినియోగం చేస్తూ చట్టాన్ని మోసం చేసే ప్రయత్నాలపై పోలీసులు అప్రమత్తంగా ఉండాలని, పౌరులు కూడా ఇలాంటి అనుమానాస్పద వాహనాలపై సమాచారాన్ని అందించాలని విజ్ఞప్తి చేస్తున్నారు.