సూర్యాపేట జిల్లావ్యాప్తంగా కురుస్తున్న భారీ వర్షాలు, భారత వాతావరణ శాఖ జారీ చేసిన హెచ్చరికల నేపథ్యంలో విద్యార్థుల భద్రతను దృష్టిలో ఉంచుకుని గురువారం (సెప్టెంబర్‌ 24) జిల్లాలోని అన్ని పాఠశాలలకు సెలవు ప్రకటించారు. ప్రభుత్వ, ప్రభుత్వరంగ, ఎయిడెడ్, ప్రైవేట్ పాఠశాలలకు ఈ సెలవు వర్తిస్తుందని జిల్లా కలెక్టర్‌ తెలిపారు. వర్షాల పరిస్థితులను దృష్టిలో ఉంచుకుని సంబంధిత అధికారులు సమన్వయంతో ఉత్తర్వులను తక్షణమే అమలు చేయాలని ఆదేశించారు. తల్లిదండ్రులు, విద్యార్థులు అప్రమత్తంగా ఉండాలని సూచించారు. అత్యవసరం కాని ప్రయాణాలను నివారించాలని, పొంగిపొర్లుతున్న వాగులు, కాజ్‌వేలు, నీరు నిలిచిన ప్రాంతాలకు దూరంగా ఉండాలని అధికారులు విజ్ఞప్తి చేశారు.