గాంధీ జయంతిని పురస్కరించుకుని జాతీయ జర్నలిస్టుల డిమాండ్ల దినోత్సవం సందర్భంగా నారాయణఖేడ్ పట్టణంలో జర్నలిస్టులు భారీ బైక్ ర్యాలీ నిర్వహించారు. ఐబీ అతిథి గృహం నుంచి ప్రారంభమైన ర్యాలీ పట్టణంలోని ప్రధాన వీధుల మీదుగా సాగి మహాత్మా గాంధీ విగ్రహం వద్దకు చేరుకుంది. అనంతరం గాంధీ విగ్రహానికి వినతిపత్రం సమర్పించి జర్నలిస్టుల సమస్యలను ప్రభుత్వం దృష్టికి తీసుకెళ్లారు.ఈ సందర్భంగా జర్నలిస్టులు మాట్లాడుతూ దేశవ్యాప్తంగా జర్నలిస్టులపై జరుగుతున్న దాడులను అరికట్టి, వారి ఉద్యోగ భద్రత కోసం ప్రత్యేక చట్టం తీసుకురావాలని డిమాండ్ చేశారు. కేంద్ర, రాష్ట్ర ప్రభుత్వాలు జర్నలిస్టుల సమస్యల పట్ల నిర్లక్ష్య వైఖరిని వీడి, ఎన్నికల సమయంలో ఇచ్చిన హామీలను వెంటనే అమలు చేయాలని కోరారు. ప్రతి వర్కింగ్ జర్నలిస్టుకు ఇళ్లు, ఇళ్ల స్థలాలు కేటాయించడంతో పాటు ప్రభుత్వ ఉద్యోగులకు అందిస్తున్న ఆరోగ్య కార్డు సదుపాయాన్ని జర్నలిస్టులకు కూడా వర్తింపజేయాలని విజ్ఞప్తి చేశారు. కార్యక్రమంలో జిల్లా ఎలక్ట్రానిక్ మీడియా అధ్యక్షుడు సయ్యద్ ఆసిఫ్, జిల్లా ఉపాధ్యక్షుడు ఈ. వెంకటేశం, సంయుక్త కార్యదర్శి అబ్దుల్ రాహుఫ్, కార్యవర్గ సభ్యుడు హసీబ్ పాటిల్, నియోజకవర్గ గౌరవ అధ్యక్షుడు హలీం, డివిజన్ అధ్యక్షుడు జీ. సత్యం, ప్రధాన కార్యదర్శి కే. భూమయ్యతో పాటు బి. రాములు, జావిద్, జి. విఠల్, అశోక్, నాథేక్, అంజయ్య, జైపాల్ రెడ్డి, రషీద్, వీర రెడ్డి, సంతోష్, నిసార్, రవీందర్, అంబదాస్, రాములు, శ్రీశైలం, వడ్ల వెంకటరమణ, వడ్ల జ్ఞానేశ్వర్, గౌలి మేఘారం, కౌసర్ తదితర జర్నలిస్టులు పాల్గొన్నారు.