కంగ్టి మండల పరిధిలోని చప్తా-కే గ్రామ శివారులో సోమవారం రోడ్డు ప్రమాదం చోటుచేసుకుంది. కర్ణాటక రాష్ట్రం ఔరాద్‌కు చెందిన హనుమంతు తన వ్యక్తిగత పనిమీద పిట్లం వైపు బైక్‌పై వెళ్తుండగా, రహదారిపై ఉన్న గుంతల కారణంగా బైక్ అదుపుతప్పి కిందపడిపోయినట్లు సమాచారం.ఈ ప్రమాదంలో హనుమంతుకు తీవ్ర గాయాలయ్యాయి. సమాచారం అందుకున్న 108 సిబ్బంది వెంటనే ప్రమాద స్థలానికి చేరుకుని హనుమంతును అంబులెన్స్‌లో కంగ్టి ప్రాథమిక ఆరోగ్య కేంద్రానికి తరలించారు. అక్కడ ప్రాథమిక చికిత్స అనంతరం మెరుగైన వైద్యం కోసం కుటుంబ సభ్యులు సొంత వాహనంలో బీదర్‌కు తీసుకెళ్లినట్లు తెలిసింది.రహదారిపై ప్రమాదకరంగా ఉన్న గుంతల కారణంగానే ప్రమాదం జరిగినట్లు స్థానికులు పేర్కొంటున్నారు. సంబంధిత అధికారులు స్పందించి గుంతలను పూడ్చి రహదారిపై ప్రయాణికులకు ఇబ్బందులు లేకుండా చర్యలు తీసుకోవాలని స్థానికులు కోరుతున్నారు.