‘ప్రజావాణి’లో జిల్లా అధికారులకు జిఎంపిఎస్ వినతి

రూ. 50 లక్షలతో నిర్మించినా ఊపయోగంలోకి రాని వైనం

చౌటుప్పల్ మున్సిపల్ కేంద్రంలో కోట్ల విలువైన ఆస్తులు వృథాగా మారుతున్నాయని, రూర్బన్ మిషన్ ద్వారా నిర్మించిన గొర్రెల మార్కెట్ యార్డ్‌ను వెంటనే అందుబాటులోకి తీసుకురావాలని గొర్రెల మేకల పెంపకం దారుల సంఘం మండల కమిటీ డిమాండ్ చేసింది. సోమవారం యాదాద్రి భువనగిరి జిల్లా కలెక్టరేట్‌లో నిర్వహించిన ‘ప్రజావాణి’ కార్యక్రమంలో డిఆర్డిఏ పిడి నాగిరెడ్డికి ఈ మేరకు వినతిపత్రం అందజేశారు.​ఈ సందర్భంగా సంఘం నాయకులు మాట్లాడుతూ.. ఎన్నో ఏళ్ల పోరాటాల ఫలితంగా 2024లో రూర్బన్ మిషన్ కింద రూ. 50 లక్షల వ్యయంతో ఈ గొర్రెల మార్కెట్ యార్డ్‌ను నిర్మించినట్లు తెలిపారు. నిర్మాణం పూర్తయినా అధికారులు దీనిని వినియోగంలోకి తీసుకురాకపోవడంతో ప్రస్తుతం నిరుపయోగంగా మారిపోయిందని ఆవేదన వ్యక్తం చేశారు. అధికారుల నిర్లక్ష్యం కారణంగా జీవాల తాగునీటి కోసం వేసిన బోరు మోటార్‌ను గుర్తుతెలియని వ్యక్తులు దొంగిలించారని, అలాగే తాగునీటి నల్లాలను పూర్తిగా ధ్వంసం చేశారని ఆరోపించారు.​వెంటనే స్పందించి మార్కెట్ యార్డ్‌లో మౌలిక వసతులు పునరుద్ధరించి, పెంపకందారులకు అందుబాటులోకి తీసుకురావాలని కోరారు. ఈ కార్యక్రమంలో ఉమ్మడి నల్గొండ జిల్లా గొర్రెల పెంపకందారుల సహకార యూనియన్ జిల్లా డైరెక్టర్ బండారు నరసింహ, జిల్లా కార్యదర్శి దయ్యాల నరసింహ, నాయకులు అవిశెట్టి పాండు, పాక జహంగీర్, చౌటుప్పల్ మండల కార్యదర్శి కొండే శ్రీశైలం, మున్సిపల్ కన్వీనర్ గుణమోని ఐలయ్య, మండల ఉపాధ్యక్షులు గజ్జి పాండు తదితరులు పాల్గొన్నారు.