గడ్డిఅన్నారం, అక్టోబర్ 1: తెలంగాణ సిద్ధాంతకర్త ఆచార్య కొండా లక్ష్మణ్ బాపూజీ జయంతి సందర్భంగా ప్రకటించిన రాష్ట్రస్థాయి ప్రతిష్టాత్మక అవార్డుల్లో గడ్డిఅన్నారం డివిజన్‌ పి.&టి. కాలనీకి చెందిన పున్న శ్రీనివాస్‌కు స్థానం దక్కింది. సామాజిక సేవా రంగంలో ఆయన చేసిన కృషికి ఈ గుర్తింపు లభించింది.

ఈ సందర్భంగా గడ్డిఅన్నారం మాజీ కార్పొరేటర్ భవానీ ప్రవీణ్ కుమార్ శ్రీనివాస్‌ను ఆయన నివాసంలో కలిసి శాలువాతో సత్కరించి అభినందించారు. కొండా లక్ష్మణ్ బాపూజీ ఆశయాల సాధనకు కృషి చేస్తూ సమాజ సేవకు అంకితమైన శ్రీనివాస్‌కు అవార్డు రావడం గడ్డిఅన్నారం డివిజన్‌కు గర్వకారణమని భవానీ ప్రవీణ్ కుమార్ పేర్కొన్నారు. భవిష్యత్‌లో మరిన్ని ఉన్నత పురస్కారాలు అందుకోవాలని ఆకాంక్షించారు.