ఎన్‌హెచ్ఎం ఉద్యోగుల ఆవేదన.. రెగ్యులరైజేషన్‌ కోసం డిమాండ్‌

న్యాయం జరిగే వరకు పోరాటం ఆగదు...

17 వేల మంది ఉద్యోగులను క్రమబద్ధీకరించాలి...

నల్గొండ జిల్లా: ప్రభుత్వ ఆరోగ్య వ్యవస్థలో కీలక పాత్ర పోషిస్తూ, ఏళ్ల తరబడి ప్రజలకు వైద్య సేవలందిస్తున్న జాతీయ ఆరోగ్య మిషన్‌ (ఎన్‌హెచ్ఎం) ఉద్యోగులకు ఉద్యోగ భద్రత కరువైందని కాంట్రాక్టు, ఔట్‌సోర్సింగ్‌ సిబ్బంది ఆవేదన వ్యక్తం చేశారు. ప్రజల ఆరోగ్య పరిరక్షణే లక్ష్యంగా నిరంతరం విధులు నిర్వహిస్తున్నప్పటికీ తమ సేవలకు తగిన గుర్తింపు లభించడం లేదని వాపోయారు. రాష్ట్రవ్యాప్తంగా పనిచేస్తున్న సుమారు 17 వేల మంది ఎన్‌హెచ్ఎం ఉద్యోగులను వెంటనే రెగ్యులరైజ్‌ చేయాలని డిమాండ్‌ చేశారు. తమ న్యాయమైన డిమాండ్లు పరిష్కారమయ్యే వరకు పోరాటాన్ని కొనసాగిస్తామని స్పష్టం చేశారు.

ప్రభుత్వ ఆసుపత్రులు, ప్రాథమిక ఆరోగ్య కేంద్రాలు, ఇతర వైద్య విభాగాల్లో ప్రజలకు నిరంతరం సేవలందిస్తున్న తమకు ఉద్యోగ భద్రత లేకపోవడం ఆందోళన కలిగిస్తోందని ఉద్యోగులు పేర్కొన్నారు. చాలాకాలంగా విధులు నిర్వహిస్తున్నప్పటికీ కాంట్రాక్టు, ఔట్‌సోర్సింగ్‌ విధానాల్లోనే కొనసాగాల్సి వస్తోందని తెలిపారు. తగిన వేతనాలు, ఇతర ఉద్యోగ ప్రయోజనాలు అందకపోవడంతో కుటుంబ పోషణ భారంగా మారుతోందని ఆవేదన వ్యక్తం చేశారు. ప్రజా ప్రభుత్వం తమ సమస్యలను అర్థం చేసుకుని పరిష్కరిస్తుందన్న ఆశతో ఎదురుచూస్తున్నామని చెప్పారు. ప్రజారోగ్య వ్యవస్థ బలోపేతానికి తమ వంతు కృషి చేస్తున్న ఉద్యోగుల సేవలను గుర్తించి, రెగ్యులరైజేషన్‌ ప్రక్రియను వెంటనే ప్రారంభించాలని కోరారు.

రెగ్యులరైజేషన్‌ జరిగే వరకు పూర్తి వేతనం ఇవ్వాలి...

ఉద్యోగుల క్రమబద్ధీకరణ పూర్తయ్యే వరకు 100 శాతం గ్రాస్‌ శాలరీ చెల్లించాలని, ఉద్యోగ భద్రతతోపాటు ఆరోగ్య భద్రత కల్పించాలని డిమాండ్‌ చేశారు. విధి నిర్వహణలో ఎదురవుతున్న సమస్యలను పరిగణనలోకి తీసుకుని తమకు న్యాయంగా దక్కాల్సిన ప్రయోజనాలను అమలు చేయాలని ప్రభుత్వానికి విజ్ఞప్తి చేశారు. అలాగే 180 రోజుల వేతనంతో కూడిన ప్రసూతి సెలవులు మంజూరు చేయాలని కోరారు. ప్రతి సంవత్సరం 5 శాతం వార్షిక ఇంక్రిమెంట్లు, 8 శాతం లాయల్టీ బోనస్‌ అందించాలని, పీఆర్సీ (వేతన సవరణ సంఘం) ప్రయోజనాలను వర్తింపజేయాలని డిమాండ్‌ చేశారు. ఈ ప్రయోజనాలు కల్పించడం ద్వారా ఉద్యోగులు ఆర్థికంగా కొంతమేర స్థిరత్వం పొందే అవకాశం ఉంటుందని పేర్కొన్నారు.

మా కుటుంబాల భద్రత ఎవరిది...

ప్రజల ఆరోగ్య పరిరక్షణ కోసం తమ జీవితాలను అంకితం చేసి పనిచేస్తున్నామని, అయితే తమ కుటుంబాల భవిష్యత్తుకు భరోసా లేకుండా పోతోందని ఉద్యోగులు ఆవేదన వ్యక్తం చేశారు. ప్రజలకు వైద్య సేవలు అందించే తమకు కనీస ఉద్యోగ భద్రత కల్పించకపోవడం తీవ్ర మనోవేదనకు గురిచేస్తోందన్నారు. ఏళ్ల తరబడి సేవలందిస్తున్నప్పటికీ తమ భవిష్యత్తుపై స్పష్టత లేకపోవడం, కుటుంబ అవసరాలు తీర్చేందుకు ఇబ్బందులు ఎదుర్కోవాల్సి రావడం బాధాకరమని పేర్కొన్నారు. ప్రభుత్వం ఇకనైనా స్పందించి తమ సమస్యలను పరిష్కరించాలని, ఇచ్చిన హామీలకు అనుగుణంగా న్యాయం చేయాలని విజ్ఞప్తి చేశారు.

డిమాండ్లు నెరవేరే వరకు ఉద్యమం...

తమ డిమాండ్ల సాధన కోసం ఎన్ని ఇబ్బందులు ఎదురైనా వెనక్కి తగ్గేది లేదని ఎన్‌హెచ్ఎం, ఎంఎల్‌హెచ్‌పీ ఉద్యోగులు స్పష్టం చేశారు. రెగ్యులరైజేషన్‌తోపాటు వేతనాలు, సెలవులు, ఇంక్రిమెంట్లు, బోనస్‌, పీఆర్సీ ప్రయోజనాలు, ఉద్యోగ భద్రత కల్పించే వరకు పోరాటాన్ని కొనసాగిస్తామని తెలిపారు. ప్రజలకు మెరుగైన వైద్య సేవలు అందించాలంటే వైద్య సిబ్బందికి కూడా తగిన భరోసా, ప్రోత్సాహం అవసరమని పేర్కొన్నారు. ఈ కార్యక్రమంలో ఐదో రోజు ఆందోళనలో భాగంగా ఏఎన్ఎం రోజూ, డాక్టర్‌ సైదులు, ఉపేందర్‌, డాక్టర్‌ రమేష్‌, అనిల్‌, సంతోష్‌, డాక్టర్‌ ప్రియాంకతో పాటు నర్సులు, ఇతర ఎన్‌హెచ్ఎం, ఎంఎల్‌హెచ్‌పీ ఉద్యోగులు పాల్గొన్నారు.