పట్టించుకోని అధికారులు.. ప్రమాదం జరిగితేనే స్పందిస్తారా?

చిట్యాల: నల్లగొండ జిల్లా చిట్యాల మున్సిపాలిటీ పరిధిలోని 1వ వార్డులో ప్రమాదకరంగా ఉన్న మ్యాన్‌హోల్ గుంత స్థానికులను ఆందోళనకు గురిచేస్తోంది. మ్యాన్‌హోల్ వద్ద ఎలాంటి రక్షణ చర్యలు లేకపోవడంతో అటుగా రాకపోకలు సాగించే ప్రజలు, వాహనదారులకు ప్రమాదం పొంచి ఉంది.

ప్రమాదకర పరిస్థితి నెలకొన్నప్పటికీ సంబంధిత అధికారులు పట్టించుకోవడం లేదని స్థానికులు వాపోతున్నారు. నిత్యం ప్రజలు రాకపోకలు సాగించే ప్రాంతంలో మ్యాన్‌హోల్ గుంత ప్రమాదకరంగా ఉండటం పట్ల ఆందోళన వ్యక్తం చేస్తున్నారు. చిన్నపిల్లలు, వృద్ధులు ఏమాత్రం ఏమరపాటుగా ఉన్నా ప్రమాదానికి గురయ్యే అవకాశం ఉందని చెబుతున్నారు.

ప్రజల భద్రతను దృష్టిలో ఉంచుకుని మున్సిపల్ అధికారులు తక్షణమే స్పందించాలని స్థానికులు కోరుతున్నారు. మ్యాన్‌హోల్ గుంతకు వెంటనే మూత ఏర్పాటు చేయడంతో పాటు అవసరమైన హెచ్చరికలు, రక్షణ చర్యలు చేపట్టాలని విజ్ఞప్తి చేస్తున్నారు. ప్రమాదం జరిగిన తర్వాత స్పందించడం కంటే.. ముందుగానే అప్రమత్తమై చర్యలు తీసుకోవాలని అధికారులను కోరుతున్నారు.