జాతీయ రహదారిపై రాస్తారోకో..

మునగాల, సెప్టెంబర్‌ 22: విద్యుత్‌ కోతలకు నిరసనగా సూర్యాపేట జిల్లా మునగాల మండల కేంద్రంలోని విద్యుత్‌ సబ్‌స్టేషన్‌ను మాజీ ఎమ్మెల్యే బొల్లం మల్లయ్య యాదవ్‌ ఆధ్వర్యంలో బీఆర్‌ఎస్‌ శ్రేణులు ముట్టడించాయి. అనంతరం విజయవాడ–హైదరాబాద్‌ జాతీయ రహదారిపై బైఠాయించి రాస్తారోకో నిర్వహించారు.

ఈ సందర్భంగా రైతులకు నిరంతర విద్యుత్‌ సరఫరా చేయాలని బీఆర్‌ఎస్‌ నాయకులు డిమాండ్‌ చేశారు. విద్యుత్‌ కోతల కారణంగా పంట పొలాలకు సాగునీరు అందక పంటలు ఎండిపోతున్నాయని మాజీ ఎమ్మెల్యే మల్లయ్య యాదవ్‌ ఆగ్రహం వ్యక్తం చేశారు. ప్రభుత్వం వెంటనే విద్యుత్‌ కోతలను నిలిపివేసి రైతులకు నాణ్యమైన విద్యుత్‌ అందించాలని కోరారు.రాస్తారోకోతో జాతీయ రహదారిపై వాహనాల రాకపోకలకు తీవ్ర అంతరాయం ఏర్పడింది. ఇరువైపులా సుమారు రెండు కిలోమీటర్ల మేర వాహనాలు నిలిచిపోయాయి. సమాచారం అందుకున్న పోలీసులు అక్కడికి చేరుకుని ట్రాఫిక్‌ను క్రమబద్ధీకరించారు.

మంత్రి ఉత్తమ్‌కుమార్‌రెడ్డి నియోజకవర్గంలో ఎక్కడ పర్యటించినా అడ్డుకుంటామని బీఆర్‌ఎస్‌ శ్రేణులు హెచ్చరించాయి. ఈ ఆందోళనతో మునగాలలో కొంతసేపు ఉద్రిక్త వాతావరణం నెలకొంది.