విద్యతోపాటు విలువలు నేర్పా

భువనగిరి: విద్యార్థులకు పాఠ్యాంశాలతోపాటు క్రమశిక్షణ, నైతిక విలువలు, సామాజిక బాధ్యత, దేశభక్తిని నేర్పించి ఉత్తమ పౌరులుగా తీర్చిదిద్దాలని ప్రభుత్వ విప్‌, ఆలేరు ఎమ్మెల్యే బీర్ల అయిలయ్య, భువనగిరి ఎమ్మెల్యే కుంభం అనిల్‌కుమార్‌రెడ్డి అన్నారు. సమాజ నిర్మాణంలో ఉపాధ్యాయుల పాత్ర కీలకమని పేర్కొన్నారు.

భువనగిరిలోని సుమంగళి ఫంక్షన్‌హాల్‌లో ట్రస్మా జిల్లా అధ్యక్షుడు పాలకూర్ల వెంకటేష్‌గౌడ్‌, ప్రధాన కార్యదర్శి దాసరి శ్రీరాములు ఆధ్వర్యంలో ఆదివారం గురుపూజోత్సవం నిర్వహించారు. కార్యక్రమానికి హాజరైన అతిథులు సరస్వతీదేవి విగ్రహానికి పూలమాల వేసి జ్యోతి ప్రజ్వలన చేశారు.

127 పాఠశాలల ప్రతినిధులకు సన్మానం

జిల్లాలోని 17 మండలాలకు చెందిన 127 పాఠశాలల కరస్పాండెంట్లు, ఉత్తమ ఉపాధ్యాయులను శాలువాలు, మెమొంటోలు, ప్రశంసాపత్రాలతో సత్కరించారు. మారుతున్న కాలానికి అనుగుణంగా ఆధునిక బోధనా పద్ధతులు అవలంబించి విద్యార్థుల్లో సృజనాత్మకత, ప్రశ్నించే తత్వం, నైపుణ్యాలను పెంపొందించాలని సూచించారు. విద్యార్థుల భవిష్యత్‌ రూపకల్పనలో తల్లిదండ్రులతోపాటు ఉపాధ్యాయుల పాత్ర ఎంతో ముఖ్యమన్నారు. బడ్జెట్‌ పాఠశాలల కరస్పాండెంట్ల సమస్యల పరిష్కారానికి అండగా ఉంటామని హామీ ఇచ్చారు.

కార్యక్రమంలో మున్సిపల్‌ చైర్మన్‌ తంగళ్లపల్లి శ్రీవాణి రవికుమార్‌, ట్రస్మా గౌరవ అధ్యక్షులు మెరుగు మధు, గాదె సోమిరెడ్డి, కోశాధికారి వంగూరి పాండు, నాయకులు మిర్యాల దుర్గప్రసాద్‌, కాటా చిన్నప్ప, యాదయ్య తదితరులు పాల్గొన్నారు.