భువనగిరి, సెప్టెంబర్ 27: ఏఐఎస్ఎఫ్ యాదాద్రి భువనగిరి జిల్లా నూతన అధ్యక్ష, కార్యదర్శులుగా కందుల మధు, ఉప్పుల శాంతికుమార్ ఏకగ్రీవంగా ఎన్నికయ్యారు. ఆలేరు పట్టణంలో శనివారం నిర్వహించిన ఏఐఎస్ఎఫ్ జిల్లా 4వ మహాసభలో నూతన జిల్లా కమిటీని ఎన్నుకున్నారు. ఉపాధ్యక్షులుగా చిప్పలపల్లి నవీన్, సహాయ కార్యదర్శిగా లోకేష్, కోశాధికారిగా జిట్టా గౌతంతోపాటు 19 మంది కౌన్సిల్ సభ్యులు ఎన్నికయ్యారు.

ఈ సందర్భంగా ఏఐఎస్ఎఫ్ రాష్ట్ర కార్యదర్శి పుట్ట లక్ష్మణ్ మాట్లాడుతూ నూతన జిల్లా కమిటీ ఏకగ్రీవంగా ఎన్నికైనట్లు తెలిపారు. నూతన అధ్యక్ష, కార్యదర్శులు కందుల మధు, ఉప్పుల శాంతికుమార్ మాట్లాడుతూ జిల్లాలో విద్యార్థులు ఎదుర్కొంటున్న విద్యారంగ సమస్యలపై ఏఐఎస్ఎఫ్ ఆధ్వర్యంలో పోరాటాలు నిర్వహిస్తామని తెలిపారు. మండలాల వారీగా సంఘాన్ని బలోపేతం చేసి, జిల్లా వ్యాప్తంగా విద్యార్థుల సమస్యల పరిష్కారానికి కృషి చేస్తామన్నారు. ఎన్నికకు సహకరించిన రాష్ట్ర కార్యదర్శి పుట్ట లక్ష్మణ్, సీపీఐ జిల్లా కార్యదర్శి యానాల దామోదర్‌రెడ్డి, జిల్లా కార్యవర్గానికి కృతజ్ఞతలు తెలిపారు.