ఆచార్య నాగార్జున విశ్వవిద్యాలయం వైస్‌ ఛాన్సలర్‌ను విశ్వవిద్యాలయాల దివ్యాంగుల ఫోరం తెలంగాణ రాష్ట్ర కమిటీ ప్రతినిధులు కలిశారు. ఈ సందర్భంగా దివ్యాంగ విద్యార్థులు ఎదుర్కొంటున్న సమస్యలను వీసీ దృష్టికి తీసుకెళ్లి వినతిపత్రం అందజేశారు.దివ్యాంగుల హక్కుల చట్టం–2016 (RPwD Act)పై విశ్వవిద్యాలయంలో ప్రత్యేక అవగాహన సదస్సు ఏర్పాటు చేయాలని ఫోరం రాష్ట్ర అధ్యక్షుడు డాక్టర్‌ ఎన్‌. అశోక్‌ కోరారు. సాధారణ విద్యార్థులకు సైతం దివ్యాంగుల హక్కులు, చట్టపరమైన రక్షణలు, సమాన అవకాశాలపై అవగాహన కల్పించాలని విజ్ఞప్తి చేశారు.చట్టం ప్రకారం విశ్వవిద్యాలయంలో దివ్యాంగులకు అవసరమైన మౌలిక వసతులు, సౌకర్యాలు కల్పించడంతో పాటు అందరికీ అందుబాటులో ఉండే విధంగా చర్యలు తీసుకోవాలని కోరారు. దివ్యాంగ విద్యార్థులకు నైపుణ్య ఆధారిత విద్య అందించాలని, వారి అర్హతకు అనుగుణంగా అన్ని కోర్సుల్లో సమాన అవకాశాలు కల్పించాలని విజ్ఞప్తి చేశారు. విద్యాభ్యాసంలో ఎలాంటి వివక్షకు తావులేకుండా చర్యలు తీసుకోవాలని వీసీకి వివరించారు.

దీనిపై వీసీ సానుకూలంగా స్పందిస్తూ దివ్యాంగుల హక్కుల చట్టం–2016పై అవగాహన సదస్సు నిర్వహించేందుకు చర్యలు తీసుకుంటామని హామీ ఇచ్చారు.

కార్యక్రమంలో ఫోరం తెలంగాణ రాష్ట్ర వర్కింగ్‌ ప్రెసిడెంట్‌ మారవేణి చంద్రశేఖర్‌ యాదవ్, రాష్ట్ర సహాయక కార్యదర్శి శ్రీశైలం తదితరులు పాల్గొన్నారు.