విజయవాడ–హైదరాబాద్ మార్గంలో వాహనాల రద్దీ…

రోడ్డు మరమ్మతులతో కిలోమీటర్ల మేర జాం

నల్గొండ జిల్లా చిట్యాల కేంద్రంలో నేషనల్ హైవే–65 పై ఆదివారం భారీ ట్రాఫిక్ నెలకొంది. వరుస సెలవుల నేపథ్యంలో స్వగ్రామాలకు వెళ్లిన ప్రజలు తిరిగి హైదరాబాద్‌కు బయలుదేరడంతో వాహనాల రద్దీ అమాంతం పెరిగింది. రేపు సోమవారం పనిదినం కావడంతో ఉద్యోగులు, విద్యార్థులు ముందుగానే ప్రయాణం మొదలుపెట్టడం ట్రాఫిక్ సమస్యను మరింత తీవ్రమైంది.

విజయవాడ వైపు నుంచి హైదరాబాద్ దిశగా భారీగా వాహనాలు తరలివస్తుండగా, చిట్యాల వద్ద రోడ్డు మరమ్మతులు కొనసాగుతున్నాయి. దీంతో వాహనాలు నెమ్మదిగా కదలడంతో ప్రధాన రహదారిపై కిలోమీటర్ల మేర ట్రాఫిక్ జాం ఏర్పడింది.

హైవే పై ఒత్తిడి పెరగడంతో అనేక వాహనాలు సర్వీస్ రోడ్లపైకి మళ్లించబడగా, అక్కడ కూడా వాహనాలు నిలిచిపోవడంతో స్థానికులు తీవ్ర ఇబ్బందులు ఎదుర్కొన్నారు. గంటల తరబడి ట్రాఫిక్‌లో చిక్కుకున్న వాహనదారులు అసహనం వ్యక్తం చేస్తున్నారు.ట్రాఫిక్‌ను నియంత్రించేందుకు పోలీసులు ప్రయత్నాలు చేస్తున్నప్పటికీ, వాహనాల అధిక రద్దీ కారణంగా పరిస్థితి అదుపులోకి రావడం కష్టంగా మారింది. అధికారులు తక్షణ చర్యలు తీసుకుని ట్రాఫిక్ సమస్యను పరిష్కరించాలని స్థానికులు కోరుతున్నారు.