దట్టమైన పొగతో శివునేనిగూడెం ముసురుకుపోయింది – ప్రజల్లో ఆందోళన

నల్గొండ జిల్లా చిట్యాల మున్సిపాలిటీ పరిధిలో సోమవారం భారీ అగ్నిప్రమాదం సంభవించింది. పట్టణంలోని 1వ వార్డులో ఉన్న మున్సిపల్ డంపింగ్ యార్డ్‌లో అకస్మాత్తుగా మంటలు చెలరేగాయి.

డంపింగ్ యార్డ్‌లో నిల్వ ఉన్న ప్లాస్టిక్‌తో పాటు ఇతర వ్యర్థ పదార్థాలకు మంటలు అంటుకోవడంతో అగ్ని వేగంగా వ్యాపించింది. ఈ మంటల వల్ల భారీగా ఎగసిపడుతున్న దట్టమైన పొగ సమీపంలోని శివునేనిగూడెం గ్రామాన్ని పూర్తిగా కమ్మేసింది.

గాలి దిశ గ్రామం వైపుకు ఉండటంతో పరిస్థితి మరింత తీవ్రంగా మారింది. పొగ కారణంగా స్థానిక ప్రజలు శ్వాస తీసుకోవడంలో ఇబ్బందులు ఎదుర్కొంటూ ఆందోళనకు గురవుతున్నారు.

సమాచారం అందుకున్న స్థానికులు మున్సిపల్ అధికారులకు ఫిర్యాదు చేయగా, వెంటనే అగ్నిమాపక సిబ్బందికి సమాచారం అందించినట్లు తెలిసింది. అగ్నిని అదుపులోకి తీసుకురావడానికి చర్యలు కొనసాగుతున్నాయి.

ఈ ఘటనతో పరిసర ప్రాంతాల్లో కలకలం రేగింది.