ఆర్టీఐతో వెలుగులోకి వచ్చిన వివరాలు.. మున్సిపల్ అధికారుల స్పష్టీకరణ.

చిట్యాల: చిట్యాల మున్సిపాలిటీ పరిధిలోని ఆరో వార్డు వెంకటాపురం సమీపంలోని సర్వే నంబర్‌ 308లో ఏర్పాటు చేసిన లేఅవుట్‌కు మున్సిపల్‌ అనుమతులు లేవని అధికారులు స్పష్టం చేశారు. సమాచార హక్కు చట్టం–2005 కింద సంతోష్‌నగర్‌కు చెందిన కాలిన శ్రీశైలం దాఖలు చేసిన దరఖాస్తుకు మున్సిపల్‌ అధికారులు అధికారికంగా సమాధానం ఇచ్చారు.

సదరు లేఅవుట్‌కు సంబంధించిన వివరాలు, ప్లాట్ల విస్తీర్ణం, మున్సిపాలిటీకి కేటాయించిన 10 శాతం స్థలం, లేఅవుట్‌ అప్రూవల్‌ ప్రొసీడింగ్స్‌, ఎల్‌పీ కాపీల వివరాలను శ్రీశైలం కోరారు.

దీనిపై స్పందించిన అధికారులు.. గతంలో మున్సిపాలిటీ సిబ్బంది స్థల పరిశీలన నిర్వహించినట్లు తెలిపారు.

అయితే సర్వే నంబర్‌ 308లోని సదరు లేఅవుట్‌కు మున్సిపాలిటీ నుంచి ఎలాంటి అనుమతులు మంజూరు కాలేదని, అందుకు సంబంధించిన రికార్డులు కూడా కార్యాలయంలో అందుబాటులో లేవని స్పష్టం చేశారు. దీంతో అనుమతులు లేకుండా లేఅవుట్‌ ఏర్పాటు చేశారన్న అంశం ఆర్టీఐ సమాధానంతో వెలుగులోకి వచ్చింది.