చిట్యాల మున్సిపాలిటీ అభివృద్ధిపై సవాళ్లు–ప్రతిసవాళ్లు

చిట్యాల మున్సిపాలిటీ అభివృద్ధిపై రాజకీయ వర్గాల్లో చర్చ వేడెక్కింది. చిరుమర్తి లింగయ్య విసిరిన సవాల్‌ను వేముల వీరేశం స్వీకరించారు. ఈ సందర్భంగా వీరేశం మాట్లాడుతూ, చిట్యాల మున్సిపాలిటీ అభివృద్ధిపై బహిరంగ చర్చకు సిద్ధంగా ఉన్నట్లు ప్రకటించారు.

కనకదుర్గమ్మ సెంటర్ సమీపంలో మున్సిపాలిటీ అభివృద్ధిపై చర్చ జరపాలని సూచించిన వీరేశం, “నేను నా భార్యను వెంట తీసుకొని చర్చకు రావడానికి సిద్ధంగా ఉన్నాను. మీరు కూడా మీ భార్యతో మాట్లాడి ఎప్పుడు రావాలో సమయాన్ని మీరే చెప్పాలి” అంటూ లింగయ్యకు కౌంటర్ ఇచ్చారు.

మున్సిపాలిటీలో చేపట్టిన అభివృద్ధి పనులు, చేపట్టని అంశాలపై ప్రజల ముందే చర్చ జరగాలన్న ఉద్దేశంతోనే ఈ సవాల్ స్వీకరించామని వీరేశం తెలిపారు. చిట్యాల అభివృద్ధిపై నిజాలు ప్రజలకు తెలియాలంటే బహిరంగ చర్చే సరైన మార్గమని ఆయన అభిప్రాయపడ్డారు.

ఈ పరిణామాలతో చిట్యాల రాజకీయ వాతావరణం ఒక్కసారిగా వేడెక్కగా, ఇరువర్గాల తదుపరి స్పందనపై స్థానికంగా ఆసక్తి నెలకొంది.