బాత్రూం తొలగించినా ఫలితం శూన్యం.. చిట్యాల ఆరో వార్డులో మున్సిపల్ పనుల తీరుపై స్థానికుల ఆగ్రహం.

నల్గొండ జిల్లా చిట్యాల మున్సిపాలిటీ ఆరో వార్డు వెంకటాపురంలో మున్సిపల్ అధికారుల పనితీరుపై స్థానికులు అసహనం వ్యక్తం చేస్తున్నారు. ఒక ప్రాంతంలో సీసీ రోడ్డు నిర్మిస్తామని చెప్పడంతో, రోడ్డుకు అడ్డుగా ఉందంటూ ఇంటి యజమానితో బాత్రూంను తొలగింపజేశారు. అయితే తీరా చూస్తే అక్కడ రోడ్డు నిర్మాణం చేపట్టకుండా మరోచోట పనులు చేపట్టినట్లు స్థానికులు చెబుతున్నారు.

ఇదిలా ఉండగా, ఇప్పటికే సీసీ రోడ్డు ఉన్న ప్రాంతంలోనే పాత రోడ్డును తొలగించి తిరిగి అదే చోట కొత్త రోడ్డు నిర్మించడంపై ప్రజలు విస్మయం వ్యక్తం చేస్తున్నారు. అవసరమైన చోట రోడ్డు వేయకుండా, ఇప్పటికే రోడ్డు ఉన్నచోటే మళ్లీ నిర్మాణం చేపట్టడం వెనుక ఆంతర్యమేమిటని ప్రశ్నిస్తున్నారు.

ప్రజాధనం వెచ్చించే అభివృద్ధి పనుల్లో ప్రణాళిక, పారదర్శకత ఉండాలని, ప్రజలకు నిజంగా అవసరమైన ప్రాంతాల్లోనే పనులు చేపట్టాలని స్థానికులు కోరుతున్నారు. బాత్రూం తొలగించి నష్టపోయిన ఇంటి యజమానికి న్యాయం చేయడంతో పాటు, సంబంధిత అధికారులు స్పందించి పనుల తీరుపై విచారణ జరపాలని డిమాండ్ చేస్తున్నారు.