నారాయణఖేడ్ నియోజకవర్గంలోని నారాయణఖేడ్ మండల పరిధిలోని జుక్కల్ గ్రామంలో జగజ్యోతి మహాత్మా బసవేశ్వర స్వామి జయంతి వేడుకలు భక్తి శ్రద్ధలతో ఘనంగా నిర్వహించబడ్డాయి. ఈ కార్యక్రమానికి నారాయణఖేడ్ శాసనసభ్యుడు డాక్టర్ పట్లోళ్ల సంజీవరెడ్డి, మున్సిపల్ చైర్మన్ నాగేష్ కుమార్ షేట్కార్ ముఖ్య అతిథులుగా హాజరై కార్యక్రమానికి ప్రత్యేకత తీసుకువచ్చారు. ఈ సందర్భంగా ఎమ్మెల్యే బసవేశ్వర స్వామి విగ్రహానికి పూలమాలలు వేసి ఘనంగా నివాళులు అర్పించి ప్రత్యేక పూజలు నిర్వహించారు. అనంతరం గ్రామ ప్రజలందరికీ బసవ జయంతి శుభాకాంక్షలు తెలియజేస్తూ, మహాత్మా బసవేశ్వరుడు కులరహిత, సమానత్వ సమాజ నిర్మాణానికి కృషి చేసిన గొప్ప సంస్కర్త అని పేర్కొన్నారు. “కాయకవే కైలాసం” అనే సూత్రంతో శ్రమకు గౌరవం తీసుకొచ్చిన ఆయన బోధనలు ప్రతి ఒక్కరికీ ఆదర్శంగా నిలవాలని, ఆయన చూపిన మార్గంలో నడుస్తూ సమాజ అభ్యున్నతికి కృషి చేయాలని పిలుపునిచ్చారు. ఈ కార్యక్రమంలో గ్రామ సర్పంచ్ వినయ్, వార్డు సభ్యులు మల్లయ్య, వీరన్న, రామన్న, రావి, మల్లప్ప, అంజన్న, బానాపురం రాజు, రుక్మిణి గోపాల్ రెడ్డి, కౌన్సిలర్లు ఆనంద్ స్వామి, గ్రామ పెద్దలు, ప్రజా ప్రతినిధులు, నాయకులు మరియు గ్రామ ప్రజలు అధిక సంఖ్యలో పాల్గొని కార్యక్రమాన్ని విజయవంతం చేశారు.