దేశ ప్రగతి, ప్రజా సంక్షేమానికి అశోక్‌ సింఘాల్‌ తన జీవితాన్ని అంకితం చేశారని ప్రధానమంత్రి నరేంద్ర మోదీ పేర్కొన్నారు. అశోక్‌ సింఘాల్‌ శతజయంతి సందర్భంగా ఆయన సేవలను స్మరించుకుంటూ ప్రధాని నివాళులర్పించారు.

‘పరోపకారార్థమిదం శరీరం’ అనే భారతీయ స్ఫూర్తికి సింఘాల్‌ ప్రతిరూపమని మోదీ అన్నారు. ఆధ్యాత్మికత, సాంస్కృతిక చైతన్యం, సంస్థాగత నిర్మాణంతోపాటు అట్టడుగు వర్గాల సంక్షేమం కోసం ఆయన దశాబ్దాలపాటు కృషి చేశారని తెలిపారు. దేశంలోని మారుమూల ప్రాంతాల్లో పర్యటిస్తూ ప్రజల సమస్యలను తెలుసుకునేవారని, ప్రకృతి విపత్తుల సమయంలో బాధితులకు అండగా నిలిచేవారని పేర్కొన్నారు.2001 కచ్‌ భూకంపం సమయంలో సింఘాల్‌తో కలిసి పనిచేసిన అనుభవాన్ని మోదీ గుర్తుచేసుకున్నారు. రామజన్మభూమి ఉద్యమంలో ఆయన పోషించిన కీలక పాత్రను ప్రస్తావించారు. సామాజిక ఐక్యత, సమానత్వం, సౌభ్రాతృత్వం కోసం ఆయన నిరంతరం కృషి చేశారని తెలిపారు.విద్య, ముఖ్యంగా వేద విద్యతోపాటు సంగీతంపై సింఘాల్‌కు ప్రత్యేక ఆసక్తి ఉండేదని మోదీ చెప్పారు. ‘ఏకల్‌ విద్యాలయ’ కార్యక్రమంతో ఆయనకు సన్నిహిత సంబంధం ఉండేదని పేర్కొన్నారు. పుస్తక పఠనం, సేవా భావాన్ని యువ కార్యకర్తల్లో పెంపొందించేందుకు ఆయన ప్రోత్సహించేవారని తెలిపారు.అశోక్‌ సింఘాల్‌ జీవితం, సేవా స్ఫూర్తి యువతకు ఆదర్శంగా నిలుస్తాయని మోదీ అన్నారు. మాతృభూమి, ప్రజా సంక్షేమం కోసం ఆయన కన్న కలలను సాకారం చేసే దిశగా ప్రతి ఒక్కరూ కృషి చేయాలని పిలుపునిచ్చారు.