ఆర్ఎంపీలు అనుభవం ఉన్నా.. పరిధి దాటొద్దు-

జిల్లా ఆర్ఎంపీల సంఘం అధ్యక్షుడు దొంతగాని రవిబాబు-

ఆర్ఎంపీలు తమ పరిధికి మించి వైద్యం చేయకుండా నిబంధనలు పాటించాలని జిల్లా ఆర్ఎంపీల సంఘం అధ్యక్షుడు దొంతగాని రవిబాబు సూచించారు. కోదాడ పట్టణంలో నిర్వహించిన ఆర్ఎంపీ, పీఎంపీల అసోసియేషన్‌ సర్వసభ్య సమావేశంలో ఆయన మాట్లాడారు. అత్యవసర, అబార్షన్‌ కేసులను స్వయంగా చికిత్స చేయకుండా సంబంధిత విభాగాల నిపుణులైన వైద్యుల వద్దకు పంపించాలని సూచించారు. లింగ నిర్ధారణ పరీక్షలను ప్రోత్సహించవద్దని, పరిధికి మించి వైద్యం చేసి ప్రజల ప్రాణాలను ప్రమాదంలోకి నెట్టవద్దని అన్నారు. కొత్తగా ఆర్ఎంపీలుగా వస్తున్న వారు జిల్లా వైద్య ఆరోగ్యశాఖ సూచనలు, నిబంధనలు తప్పనిసరిగా పాటించాలని కోరారు. ప్రజలకు మెరుగైన వైద్య సేవలు అందించేందుకు ప్రతి ఒక్కరూ బాధ్యతగా వ్యవహరించాలని సూచించారు. సంఘం సభ్యుల సమస్యల పరిష్కారానికి ఐక్యంగా పనిచేయాలని పిలుపునిచ్చారు.మండల అధ్యక్షుడు భూతం శ్రీనివాసరావు అధ్యక్షతన జరిగిన సమావేశంలో వెంకటప్పయ్య, అంజిరెడ్డి, సిద్ధారెడ్డి, ఉపేందర్‌, శ్రీశైలం, ఖాజా, శౌరీ, నాగరాజు, లింగయ్య, శ్రీకాంత్‌, నాని తదితరులు పాల్గొన్నారు.