హైదరాబాద్‌, సెప్టెంబర్‌ 16 స్థానికం ప్రతినిధి :

ఛత్తీస్‌గఢ్‌లోని రాయ్‌పూర్‌లో జరిగిన ఐపీఎస్‌సీ నేషనల్స్‌–2026లో హైదరాబాద్‌ పబ్లిక్‌ స్కూల్‌, బేగంపేటకు చెందిన విద్యార్థిని ఈషిత్వ ఎస్‌.కె. టేలు సత్తాచాటింది. సెప్టెంబర్‌ 13 నుంచి 16 వరకు జరిగిన జాతీయ స్థాయి పోటీల్లో రెండు రజత పతకాలు సాధించింది.

వ్యక్తిగత విభాగంలో ఒక రజత పతకంతోపాటు టీమ్‌ ఈవెంట్‌లో మరో రజత పతకాన్ని కైవసం చేసుకుంది. 14 ఏళ్ల ఈషిత్వ జాతీయ స్థాయి రైఫిల్‌ షూటర్‌గా రాణిస్తుండగా.. టీమ్‌ ఇండియా సెలెక్షన్‌ ట్రయల్స్‌కు కూడా అర్హత సాధించింది. రాష్ట్ర, జోనల్‌, జాతీయ స్థాయి పోటీల్లో ఇప్పటికే పలు విజయాలు సాధించింది.

తాజాగా ఐపీఎస్‌సీ నేషనల్స్‌లో రెండు రజత పతకాలు సాధించడం ద్వారా తన ప్రతిభను మరోసారి చాటుకుంది. భవిష్యత్‌లో అంతర్జాతీయ స్థాయిలో భారత్‌కు ప్రాతినిధ్యం వహించడమే లక్ష్యంగా ముందుకు సాగుతున్నట్లు కుటుంబ సభ్యులు తెలిపారు..