భువనగిరి

డాక్టర్ బి.ఆర్. అంబేద్కర్ ఓపెన్ యూనివర్సిటీ ఆధ్వర్యంలోని భువనగిరి శ్రీ లక్ష్మీనరసింహస్వామి డిగ్రీ కళాశాల స్టడీ సెంటర్‌లో 2026–27 విద్యా సంవత్సరానికి బీఏ, బీకాం, బీఎస్సీ కోర్సుల్లో ప్రవేశాల కోసం ఆగస్టు 7వ తేదీ వరకు దరఖాస్తులు స్వీకరిస్తున్నట్లు స్టడీ సెంటర్ కో-ఆర్డినేటర్ డాక్టర్ గంజి రమేష్ తెలిపారు.

ఈ విద్యా సంవత్సరం నుంచి బీఎస్సీ విద్యార్థులకు సైన్స్ ప్రాక్టికల్స్‌ను భువనగిరి స్టడీ సెంటర్‌లోనే నిర్వహించనున్నట్లు పేర్కొన్నారు. తక్కువ ఫీజులతో నాణ్యమైన డిగ్రీ విద్యను అభ్యసించే అవకాశం ఓపెన్ యూనివర్సిటీ కల్పిస్తోందన్నారు. ఉద్యోగులు, గృహిణులు, మధ్యలో చదువు మానేసిన వారు ఈ అవకాశాన్ని వినియోగించుకోవాలని సూచించారు.

ఈ విద్యా సంవత్సరం నుంచి ఎస్టీ (గిరిజన) విద్యార్థులకు ఉచిత డిగ్రీ ప్రవేశ సౌకర్యం కల్పించినట్లు తెలిపారు. ఓపెన్ యూనివర్సిటీ డిగ్రీ సర్టిఫికెట్ అన్ని ప్రభుత్వ ఉద్యోగాలకు ఇతర విశ్వవిద్యాలయాల డిగ్రీలతో సమానమైన గుర్తింపు కలిగి ఉందన్నారు.

అలాగే డిగ్రీ ద్వితీయ, తృతీయ సంవత్సరం విద్యార్థులు ట్యూషన్ ఫీజు చెల్లించేందుకు కూడా ఆగస్టు 7వ తేదీ వరకు అవకాశం ఉందన్నారు. మరిన్ని వివరాలకు స్టడీ సెంటర్ జాయింట్ కో-ఆర్డినేటర్ బొజ్జ బాలయ్యను సెల్ నంబర్ 90005 90545లో సంప్రదించాలని సూచించారు.