నారాయణఖేడ్ మున్సిపల్ ఎన్నికల ఫలితాల్లో 15వ వార్డులో బిఆర్ఎస్ అభ్యర్థి రుబినా బేగం నజీబ్ 124 ఓట్ల స్పష్టమైన మెజారిటీతో విజయం సాధించారు. సమీప కాంగ్రెస్ ప్రత్యర్థిపై సాధించిన ఈ గెలుపుతో బిఆర్ఎస్ శ్రేణుల్లో ఆనందం వెల్లివిరిసింది.ఫలితాలు వెలువడిన వెంటనే కార్యకర్తలు పెద్ద సంఖ్యలో చేరుకుని బాణసంచా కాల్చి, మిఠాయిలు పంచుతూ సంబరాలు జరుపుకున్నారు.వార్డు ప్రజలు అభినందనలు తెలియజేస్తూ విజేతను శుభాకాంక్షలతో ముంచెత్తారు. ఎన్నికల సమయంలో ప్రజల సమస్యలను ఇంటింటికీ వెళ్లి తెలుసుకుని,పరిష్కారానికి కట్టుబడి ఉంటానని ఇచ్చిన హామీకి ప్రజలు మద్దతు ఇచ్చారని నాయకులు తెలిపారు.విజయం అనంతరం మాట్లాడిన రుబినా బేగం నజీబ్, తనపై విశ్వాసం ఉంచి గెలిపించిన ప్రతి ఓటరికి హృదయపూర్వక కృతజ్ఞతలు తెలిపారు. 15వ వార్డులో తాగునీరు,రహదారులు,పారిశుధ్యం,వీధి దీపాలు వంటి ప్రాథమిక సౌకర్యాల అభివృద్ధికి ప్రాధాన్యం ఇస్తానని చెప్పారు. ప్రజల సహకారంతో వార్డును ఆదర్శవంతంగా తీర్చిదిద్దేందుకు శక్తివంచన లేకుండా కృషి చేస్తానని హామీ ఇచ్చారు.ఈ విజయంతో బిఆర్ఎస్ నాయకులు, కార్యకర్తలు మరింత ఉత్సాహంతో ముందుకు సాగుతూ ప్రజల నమ్మకాన్ని నిలబెట్టుకుంటామని తెలిపారు.