రూ.15 వేల విలువైన ఉక్కా స్వాధీనం – ముగ్గురిపై కేసులు నమోదు

సూర్యాపేట పట్టణంలో అక్రమంగా ఉక్కా అమ్మకాలు నిర్వహిస్తున్న వారిపై పోలీసులు కఠిన చర్యలు చేపట్టారు. ప్రజల ఆరోగ్యాలను హానికలిగించే ఇలాంటి వ్యాపారాలు నిర్వహిస్తే కఠిన చర్యలు తప్పవని జిల్లా పోలీసు అధికారి కె. నరసింహ హెచ్చరించారు.

నమ్మదగిన సమాచారం మేరకు సూర్యాపేట పట్టణ పోలీసులు ప్రధాన వీధిలోని కొన్ని వస్త్ర దుకాణాల్లో తనిఖీలు నిర్వహించారు. ఆర్.వి ఫ్యాషన్స్, ఎక్స్ట్రీమ్ ఫ్యాషన్స్ అనే వస్త్ర దుకాణాల్లో అక్రమంగా ఉక్కా అమ్మకాలు జరుగుతున్నట్లు గుర్తించారు. తనిఖీలలో భాగంగా సుమారు రూ.15 వేల విలువైన ఉక్కా ప్యాకెట్లను స్వాధీనం చేసుకున్నారు. ఈ ఘటనకు సంబంధించి ముగ్గురు వ్యాపారులపై కేసులు నమోదు చేసినట్లు జిల్లా పోలీసు అధికారి కె. నరసింహ తెలిపారు. ప్రజల ఆరోగ్యాలను హరించే ఇలాంటి వ్యాపారాలను ఎట్టి పరిస్థితుల్లోనూ సహించబోమని ఆయన స్పష్టం చేశారు. ఉక్కా సేవించడం వల్ల ఆరోగ్యంపై తీవ్ర ప్రభావాలు పడతాయని, ముఖ్యంగా యువత ఇలాంటి చెడు అలవాట్లకు దూరంగా ఉండాలని ఆయన సూచించారు. ఎక్కడైనా ఇలాంటి అక్రమ అమ్మకాలు జరుగుతున్నట్లు తెలిసిన పక్షంలో వెంటనే పోలీసులకు సమాచారం అందించాలని ప్రజలను కోరారు.