ఉద్యమకారుల సంక్షేమానికి మంత్రి పొన్నం ప్రభాకర్ గౌడ్ కీలక ప్రకటన

తెలంగాణ రాష్ట్ర ఆవిర్భావం ఉద్యమకారుల త్యాగాలు, పోరాటాల ఫలితమని తెలంగాణ ఉద్యమకారుల ఫోరం మునుగోడు నియోజకవర్గ అధ్యక్షుడు పెద్దగోని రమేష్ గౌడ్ అన్నారు. తెలంగాణ రాష్ట్ర రోడ్డు రవాణా శాఖ మంత్రి పొన్నం ప్రభాకర్ ఉద్యమకారుల సంక్షేమంపై చేసిన ప్రకటనను ఉద్యమకారుల తరఫున హర్షిస్తున్నామని తెలిపారు.

ఉద్యమంలో భాగస్వాములైన వారికి 250 గజాల స్థలాలు కేటాయించడం, అర్హులైన వారికి పింఛన్లు మంజూరు చేయడం వంటి అంశాలపై మంత్రి చేసిన ప్రకటన ఉద్యమకారుల ఆకాంక్షలకు అనుగుణంగా ఉందని పేర్కొన్నారు.తెలంగాణ రాష్ట్రం సాధనలో అనేక మంది యువకులు, విద్యార్థులు, ప్రజా ప్రతినిధులు ప్రాణత్యాగాలు చేశారని గుర్తు చేశారు. వారి కుటుంబాల సంక్షేమం ప్రభుత్వం ప్రాధాన్యంగా తీసుకోవడం అభినందనీయమని అన్నారు.

ప్రభుత్వం తీసుకుంటున్న ఈ చర్యలు ఉద్యమకారుల ఆత్మగౌరవాన్ని నిలబెట్టే దిశగా ఉంటాయని, త్వరితగతిన అమలు చేయాలని పెద్దగోని రమేష్ గౌడ్ ప్రభుత్వాన్ని కోరారు.ఉద్యమకారుల సమస్యల పరిష్కారానికి తెలంగాణ ఉద్యమకారుల ఫోరం ఎల్లప్పుడూ కట్టుబడి ఉంటుందని ఆయన స్పష్టం చేశారు.