విజయదశమి సందర్భంగా ప్రత్యేక పూజలు నిర్వహించిన సర్పంచ్ సంతోష శ్రీనివాస్

భువనగిరి, అక్టోబర్ 19: విజయదశమి పర్వదినాన్ని పురస్కరించుకుని భువనగిరి మండలం తాజ్‌పూర్ గ్రామపంచాయతీ కార్యాలయంలో వాహన పూజలు ఘనంగా నిర్వహించారు. గ్రామ సర్పంచ్ ర్యాకల సంతోష శ్రీనివాస్ ఆధ్వర్యంలో గ్రామపంచాయతీకి చెందిన ట్రాక్టర్, ట్రాలీ, ట్యాంకర్‌తో పాటు కార్యాలయానికి ప్రత్యేక పూజలు చేశారు. పురోహితుల వేదమంత్రోచ్ఛారణల మధ్య పూజా కార్యక్రమాలను భక్తిశ్రద్ధలతో నిర్వహించారు.

ప్రజాసేవలు నిరంతరం కొనసాగాలి

గ్రామ అభివృద్ధి, పారిశుద్ధ్య నిర్వహణ, పచ్చదనం పెంపు కార్యక్రమాల్లో గ్రామపంచాయతీ వాహనాలు కీలకపాత్ర పోషిస్తున్నాయని సర్పంచ్ ర్యాకల సంతోష శ్రీనివాస్ తెలిపారు. వాహనాలు సురక్షితంగా పనిచేస్తూ ప్రజలకు మెరుగైన సేవలు అందించాలని ఆకాంక్షిస్తూ విజయదశమి సందర్భంగా పూజలు నిర్వహించినట్లు పేర్కొన్నారు. అనంతరం గ్రామ ప్రజలకు పండుగ శుభాకాంక్షలు తెలిపారు.

ఈ కార్యక్రమంలో సామాజికవేత్త డా. ర్యాకల శ్రీనివాస్, పంచాయతీ కార్యదర్శి, ఉపసర్పంచ్, వార్డు సభ్యులు, గ్రామపెద్దలు, గ్రామపంచాయతీ సిబ్బంది తదితరులు పాల్గొన్నారు.