జిల్లా పోలీస్ కార్యాలయం (డి.పి.ఓ)లో అడ్మినిస్ట్రేటివ్ అధికారిగా విధులు నిర్వహించిన ఇ. కళ్యాణి హైదరాబాద్ సిటీ కమిషనరేట్‌కు బదిలీపై వెళ్తున్న సందర్భంగా జిల్లా ఎస్పీ పరితోష్ పంకజ్ ఘనంగా వీడ్కోలు పలికారు. ఈ సందర్భంగా నిర్వహించిన కార్యక్రమంలో ఆమెను సన్మానించి జ్ఞాపికను అందజేశారు.ఎస్పీ మాట్లాడుతూ, ఉద్యోగ జీవితంలో బదిలీలు సహజమని, గత మూడు సంవత్సరాలుగా కళ్యాణి బాధ్యతాయుతంగా విధులు నిర్వహిస్తూ పోలీస్ నియామకాల ప్రక్రియను సమర్థవంతంగా నిర్వహించారని కొనియాడారు. కొత్తగా చేరిన కానిస్టేబుళ్లకు తొలి నెలలోనే వేతనం అందేలా చేసిన ఆమె కృషి ప్రశంసనీయమన్నారు. హైదరాబాద్ సిటీ కమిషనరేట్‌లో కూడా ఇదే విధంగా సేవలు అందించాలని ఆకాంక్షించారు.కళ్యాణి మాట్లాడుతూ, తన విజయానికి డి.పి.ఓ సిబ్బంది సహకారమే కారణమని, అందరి ప్రేమను ఎప్పటికీ మరిచిపోనని తెలిపారు. ఈ కార్యక్రమంలో అదనపు ఎస్పీ చైతన్య రెడ్డి తదితరులు పాల్గొన్నారు.