దుర్గాదేవి నవరాత్రి ఉత్సవాల్లో భాగంగా అమ్మవారికి ప్రత్యేక సేవలు

అధిక సంఖ్యలో పాల్గొని మొక్కులు తీర్చుకున్న మహిళా భక్తులు

పంతంగి గ్రామంలో దుర్గాదేవి నవరాత్రి ఉత్సవాలు ఆధ్యాత్మిక శోభతో అత్యంత వైభవంగా సాగుతున్నాయి. ఉత్సవాల్లో భాగంగా 'జై భవాని యూత్' ఆధ్వర్యంలో అమ్మవారికి విశేష కుంకుమ అర్చన కార్యక్రమాన్ని భక్తిశ్రద్ధలతో నిర్వహించారు. ఈ సందర్భంగా ఆలయాన్ని సర్వాంగ సుందరంగా అలంకరించి, అమ్మవారికి ప్రత్యేక పూజలు, దివ్య ఆరతులను సమర్పించారు.ఈ కుంకుమ అర్చన కార్యక్రమంలో గ్రామానికి చెందిన మహిళలు, భక్తులు పెద్ద సంఖ్యలో పాల్గొని అమ్మవారికి ప్రత్యేక అర్చనలు నిర్వహించారు. నిష్టతో పూజా కార్యక్రమాల్లో పాల్గొని, తమ కుటుంబాలు సుఖసంతోషాలతో, ఆయురారోగ్యాలతో వర్ధిల్లాలని అమ్మవారిని వేడుకున్నారు. యూత్ సభ్యులు భక్తులకు ఎటువంటి అసౌకర్యం కలగకుండా అన్ని రకాల ఏర్పాట్లను సక్రమంగా పర్యవేక్షించారు. ప్రతి ఏటా నవరాత్రి ఉత్సవాలను ఎంతో ఉత్సాహంగా, భక్తిశ్రద్ధలతో నిర్వహిస్తున్న జై భవాని యూత్ సభ్యుల కృషిని గ్రామ పెద్దలు, భక్తులు అభినందించారు. పూజా కార్యక్రమాల అనంతరం వచ్చిన భక్తులందరికీ తీర్థప్రసాదాలు పంపిణీ చేశారు. ఈ కార్యక్రమంలో జై భవాని యూత్ సభ్యులు, గ్రామ పెద్దలు, మహిళలు, స్థానిక భక్తులు పెద్ద సంఖ్యలో పాల్గొన్నారు.