నల్లగొండ ప్రభుత్వ వైద్య కళాశాల వార్షికోత్సవం

నల్లగొండలోని ప్రభుత్వ మెడికల్ కళాశాల, నల్లగొండ వార్షికోత్సవ కార్యక్రమం ఘనంగా నిర్వహించబడింది. ఈ కార్యక్రమానికి రాష్ట్ర రహదారులు, భవనాలు, సినిమాటోగ్రఫీ శాఖ మంత్రి కోమటిరెడ్డి వెంకట్ రెడ్డి ముఖ్య అతిథిగా హాజరయ్యారు.

ఈ సందర్భంగా మంత్రి మాట్లాడుతూ రాష్ట్రంలోని 35 వైద్య కళాశాలల్లో నల్లగొండ కళాశాలను అత్యుత్తమంగా అభివృద్ధి చేశామని తెలిపారు. ప్రభుత్వం అధికారంలోకి వచ్చిన సమయంలో నిర్మాణం స్లాబ్ దశలోనే నిలిచిపోయిందని, అనంతరం రూ.85 కోట్ల నిధులు కేటాయించి పనులను పూర్తి చేసి కళాశాలను ప్రారంభించామని వెల్లడించారు.

ప్రస్తుతం ఈ కళాశాలలో సుమారు 350 మంది విద్యార్థులు విద్యనభ్యసిస్తున్నారని పేర్కొంటూ, రవాణా సౌకర్యం కోసం ప్రత్యేకంగా రెండు బస్సులను నెలలోనే ప్రారంభిస్తామని ప్రకటించారు. విద్యార్థులకు ఎలాంటి సమస్యలు ఉన్నా నేరుగా తన దృష్టికి తీసుకురావాలని, ప్రభుత్వం పూర్తిగా అండగా ఉంటుందని హామీ ఇచ్చారు.

వైద్య విద్య పూర్తి చేసిన తరువాత మానవత్వాన్ని ప్రధానంగా భావించి సేవాభావంతో ప్రజలకు వైద్య సేవలు అందించాలని విద్యార్థులకు సూచించారు. అలాగే నల్లగొండ మున్సిపల్ కార్పొరేషన్‌ను మోడల్ నగరంగా అభివృద్ధి చేయడానికి చర్యలు తీసుకుంటామని తెలిపారు.

కార్యక్రమంలో కళాశాల అధ్యాపకులు, విద్యార్థులు, ప్రజాప్రతినిధులు, అధికారులు పాల్గొన్నారు.