యాదాద్రి భువనగిరి జిల్లా రామన్నపేట మండలంలోని మేజర్ గ్రామపంచాయతీలో అభివృద్ధి పనులు వేగం పుంజుకున్నాయి. గ్రామ సర్పంచ్ గరిక సత్యనారాయణ ఆధ్వర్యంలో ప్రభుత్వ జూనియర్ కళాశాల ముందు అస్తవ్యస్తంగా ఉన్న పాత డబ్బాలు, పనికిరాని నిర్మాణ అవశేషాలు, అడ్డంకిగా మారిన పాత చెట్లను తొలగించారు. యంత్రాల సహాయంతో స్థలాన్ని పూర్తిగా చదును చేయడంతో కళాశాల పరిసరాలు క్రమబద్ధంగా మారాయి.

విద్యార్థులు, అధ్యాపకులు ఇబ్బందులు పడకుండా ముందస్తు చర్యలు తీసుకున్నామని ఈ సందర్భంగా సర్పంచ్ గరిక సత్యనారాయణ తెలిపారు. నకిరేకల్ ఎమ్మెల్యే వేముల వీరేశం సూచనల మేరకు రామన్నపేటలో అభివృద్ధి పనులకు శ్రీకారం చుట్టామని, గ్రామాభివృద్ధే లక్ష్యంగా పాలకవర్గం సమిష్టిగా పనిచేస్తోందని అన్నారు.

ఈ కార్యక్రమంలో ఉపసర్పంచ్ మోటే రమేష్, వార్డు సభ్యులు, గ్రామ పెద్దలు పాల్గొని సర్పంచ్ తీసుకున్న నిర్ణయాన్ని అభినందించారు. గ్రామ అభివృద్ధికి ఇది మరో ముందడుగుగా గ్రామస్తులు పేర్కొన్నారు.