అక్టోబర్ 20 నుంచి అమల్లోకి స్వేచ్ఛా వాణిజ్య ఒప్పందం

యాదాద్రి భువనగిరి జిల్లా దండు మల్కాపూర్ నుంచి వ్యవసాయ-ఆహార ఉత్పత్తుల ఎగుమతి ప్రారంభం

అడిషనల్ డీజీఎఫ్‌టీ డాక్టర్ సంపత్ కుమార్

భారత్–న్యూజిలాండ్ స్వేచ్ఛా వాణిజ్య ఒప్పందం (ఎఫ్‌టీఏ) తెలంగాణ ఔషధ, వస్త్ర పరిశ్రమలను బలోపేతం చేయడంతో పాటు, ఎక్కువ మందికి ఉపాధి కల్పించే రంగాల్లో మరిన్ని ఉద్యోగాలను సృష్టిస్తుందని అడిషనల్ డైరెక్టర్ జనరల్ ఆఫ్ ఫారిన్ ట్రేడ్ (డీజీఎఫ్‌టీ) డాక్టర్ సంపత్ కుమార్ తెలిపారు. ఈ ఒప్పందం అక్టోబర్ 20 నుంచి అమల్లోకి రానుండటంతో, న్యూజిలాండ్‌కు భారత ఎగుమతులపై సుంకాలు పూర్తిగా తొలగిపోనున్నాయి. దీంతో పలు రంగాల్లో కొత్త ఎగుమతి అవకాశాలు అందుబాటులోకి రానున్నాయి.​ఈ ఒప్పంద అమలును పురస్కరించుకుని, తెలంగాణలోని యాదాద్రి భువనగిరి జిల్లా దండు మల్కాపూర్‌లోని టీఐఎఫ్‌-ఎంఎస్ఎంఈ గ్రీన్ ఇండస్ట్రియల్ పార్కు నుంచి వ్యవసాయ-ఆహార ఉత్పత్తులతో కూడిన ఎగుమతుల రవాణాను డాక్టర్ సంపత్ కుమార్ జెండా ఊపి ప్రారంభించారు.​ఈ సందర్భంగా ఆయన మాట్లాడుతూ.. భారత ఎగుమతులకు అన్ని సుంకాల విభాగాల్లో సున్నా సుంకంతో ప్రవేశం కల్పించడం ఈ ఒప్పందంలోని ప్రత్యేక లక్షణమని వివరించారు. గతంలో వస్త్రాలు, దుస్తులు, తోలు ఉత్పత్తులపై 10 శాతం వరకు, ఔషధాలు సహా పలు ఇతర రంగాలపై 5 శాతం వరకు ఉన్న సుంకాలు ఇప్పుడు సున్నా కానున్నాయని తెలిపారు. వీటితో పాటు సముద్ర ఉత్పత్తులు, వ్యవసాయ ఉత్పత్తులు, ప్లాస్టిక్, రసాయనాలు, విద్యుత్ పరికరాలు వంటి ఇతర రంగాలు కూడా ఈ ఒప్పందం ద్వారా ప్రయోజనం పొందనున్నాయని పేర్కొన్నారు.​తెలంగాణకు ఈ ఒప్పందం ప్రాధాన్యతను వివరిస్తూ.. హైదరాబాద్‌లోని ఔషధ పరిశ్రమతో పాటు రాష్ట్రంలో వస్త్ర పరిశ్రమ ఎక్కువగా విస్తరించినందున ఈ ఒప్పందంతో ఆయా రంగాలకు వాణిజ్య అవకాశాలు పెరుగుతాయని అన్నారు. ఇది తెలంగాణలో పారిశ్రామిక వృద్ధికి, ఉపాధి కల్పనకు ఎంతగానో తోడ్పడుతుందని తెలిపారు.