భరత్ చంద్రాచారి కుటుంబానికి ఇందిరమ్మ ఇంటి భూమిపూజ

యాదాద్రి భువనగిరి, : బదిలీ అయినా ఇచ్చిన మాటను నిలబెట్టుకున్నారని మరోసారి నిరూపించారు హనుమంతరావు. జిల్లా పరిధిలోని సంస్థాన్ నారాయణపురం మండలం కంకణాలగూడెం గ్రామానికి చెందిన భరత్ చంద్రాచారి కుటుంబానికి ప్రభుత్వం తరఫున మంజూరైన ఇందిరమ్మ ఇంటికి ఆయన స్వయంగా భూమిపూజ చేశారు.

గతంలో భరత్ చంద్రాచారిని దత్తత తీసుకున్న కలెక్టర్ ప్రతి నెల అతని విద్య కోసం రూ.5,000 ఆర్థిక సాయం అందించడంతో పాటు కుటుంబానికి అవసరమైన నెలవారీ సరుకులను కూడా అందిస్తున్నారు. నివాసానికి సొంత ఇల్లు లేక ఇబ్బందులు పడుతున్న పరిస్థితిని తెలుసుకున్న ఆయన ప్రభుత్వం ద్వారా 225 గజాల ఇంటి స్థలం మంజూరు చేయించి, ఇందిరమ్మ గృహ నిర్మాణానికి నేడు శుభారంభం చేశారు.

ఈ సందర్భంగా భరత్‌కు ఎల్లవేళలా అండగా ఉంటానని హామీ ఇచ్చారు. తనకు బదిలీ జరిగినప్పటికీ ఏ సమస్య వచ్చినా నిర్భయంగా సంప్రదించాలని సూచించారు. గృహ నిర్మాణ పనులు నాణ్యతతో, వేగవంతంగా పూర్తి చేయాలని అధికారులను ఆదేశించారు.

కార్యక్రమంలో ఆర్డీఓ శేఖర్ రెడ్డి, తహశీల్దార్ శ్రీనివాస్ రెడ్డి, ఎంపీడీఓ, ఉప పోలీస్ అధికారి, ఎంపీవో, పంచాయతీ కార్యదర్శి, సర్పంచ్, వార్డు సభ్యులు పాల్గొన్నారు.