- నల్లగొండ జిల్లా చింతపల్లి మండలం పికె మల్లేపల్లిలో ఘటన- మాజీ సర్పంచ్ భర్త కుప్పల అమర్నాథ్ పై హత్యాయత్నం, అట్రాసిటీ కేసులు నమోదు చేయాలి- సిఐటియు జిల్లా అధ్యక్ష, కార్యదర్శులు తుమ్మల వీరారెడ్డి, ఎండి సలీం ప్రకటన
నల్లగొండ జిల్లా చింతపల్లి మండలం పికె మల్లేపల్లిలో ఐకెపి విలేజ్ ఆర్గనైజేషన్ అసిస్టెంట్ (వివోఏ)గా పనిచేస్తున్న గనిపెళ్లి మాధవిపై గ్రామ సభలో బహిరంగంగా కులం పేరుతో దూషించి, దాడికి పాల్పడిన దుండగుడిని కఠినంగా శిక్షించాలని సిఐటియు జిల్లా కమిటీ డిమాండ్ చేసింది. ఈ ఘటనపై ఆదివారం సిఐటియు జిల్లా అధ్యక్షులు తుమ్మల వీరారెడ్డి, జిల్లా కార్యదర్శి ఎండి సలీం ఒక పత్రికా ప్రకటన విడుదల చేశారు.
ఈ సందర్భంగా వారు మాట్లాడుతూ, పికె మల్లేపల్లి గ్రామంలో వివోఏగా పనిచేస్తున్న గనిపెళ్లి మాధవిని మాజీ సర్పంచ్ భర్త కుప్పల అమర్నాథ్... గ్రామస్తులందరి సమక్షంలో కులం పేరుతో దూషించడమే కాకుండా, భౌతిక దాడికి పాల్పడటం అత్యంత హేయమైన చర్య అని ఖండించారు. ఒక బాధ్యతాయంతమైన పదవిలో ఉంటూ, చట్టాన్ని గౌరవించాల్సిన వ్యక్తి ఇలాంటి అరాచక చర్యలకు పాల్పడటం సమాజానికి తప్పుడు సంకేతాలను పంపుతుందని అన్నారు.
గత కొంతకాలంగా సంఘం బంధం రుణాలు చెల్లించాలని అడిగినందుకు, కొంతమంది వ్యక్తులు ఆమెను వేధింపులకు గురిచేస్తున్నారని సిఐటియు నాయకులు ఆరోపించారు. ఇందులో భాగంగానే వివోఏ మాధవిని టార్గెట్ చేసి అన్యాయంగా అధికారులకు ఫిర్యాదులు చేయడం, ఆమె పేరును ఆన్‌లైన్ నుంచి తొలగించడం వంటి చర్యలకు పాల్పడ్డారని తెలిపారు. ఈ వ్యవహారంపై కోర్టు తీర్పు వచ్చినప్పటికీ, ఆమెను తిరిగి విధుల్లోకి చేర్చుకోకుండా గ్రామ సభలో న్యాయం చేయాలని అడుగుతున్న మహిళా ఉద్యోగినిపై దాడి చేయడం సరికాదని మండిపడ్డారు.
కావున, వివోఏ గనిపెళ్లి మాధవి పై దాడి చేసిన మాజీ సర్పంచ్ భర్త కుప్పల అమర్నాథ్ పై వెంటనే ఎస్సీ, ఎస్టీ అట్రాసిటీ కేసుతో పాటు హత్యాయత్నం కేసు నమోదు చేసి కఠినంగా శిక్షించాలని వారు డిమాండ్ చేశారు. ఘటన జరిగిన వెంటనే స్పందించి పోలీసులు నిందితుడిని అరెస్టు చేయకపోవడంపై వారు అసంతృప్తి వ్యక్తం చేశారు.
ఈ దాడికి బాధ్యులైన వారిపై కఠిన చర్యలు తీసుకోని పక్షంలో, బాధితురాలికి న్యాయం జరిగే వరకు సిఐటియు ఆధ్వర్యంలో జిల్లా వ్యాప్త ఆందోళనలకు దిగుతామని వారు హెచ్చరించారు. మహిళా ఉద్యోగులకు పని ప్రదేశాలలో భద్రత కల్పించాల్సిన బాధ్యత ప్రభుత్వం మరియు అధికారులపై ఉందని గుర్తు చేశారు. ఈ కార్యక్రమంలో సిఐటియు జిల్లా కమిటీ సభ్యులు తదితరులు పాల్గొన్నారు.
పాఠకుల అభిప్రాయాలు
ఇప్పటివరకు ఎలాంటి కామెంట్స్ పోస్ట్ చేయలేదు.
కామెంట్‌ను పోస్ట్ చేయండి