విద్యుత్‌ సమస్యలపై ఫోరంకు ఫిర్యాదు చేయొచ్చు

భువనగిరి: విద్యుత్‌ వినియోగదారుల సమస్యల పరిష్కారానికి ఎలక్ట్రిసిటీ కంజ్యూమర్‌ గ్రీవెన్సెస్‌ రెడ్రెసల్‌ ఫోరం నిరంతరం అందుబాటులో ఉంటుందని సీజీఆర్‌ఎఫ్‌ చైర్‌పర్సన్‌ కే. సాయిబాబా తెలిపారు. బుధవారం భువనగిరి కిసాన్‌నగర్‌లోని విద్యుత్‌ కార్యాలయంలో నిర్వహించిన ‘విద్యుత్‌ వినియోగదారుల పరిష్కార వేదిక’లో ఆయన మాట్లాడారు.

విద్యుత్‌ సరఫరాలో అంతరాయాలు, హెచ్చుతగ్గులు, మీటర్ల సమస్యలు, బిల్లుల వివాదాలు, కొత్త సర్వీసులు, మీటర్‌ పేరుమార్పు, కేటగిరీ మార్పు, ట్రాన్స్‌ఫార్మర్‌ సమస్యలపై ఫోరంకు వ్రాతపూర్వకంగా లేదా ఆన్‌లైన్‌లో ఫిర్యాదు చేయవచ్చన్నారు. సమస్యలను సకాలంలో పరిష్కరించుకునేందుకు వినియోగదారులు ఈ అవకాశాన్ని సద్వినియోగం చేసుకోవాలని సూచించారు.

సమస్యలు సత్వరమే పరిష్కరించాలి

విద్యుత్‌ వినియోగదారుల సమస్యలను అధికారులు సత్వరమే పరిష్కరించాలని వినియోగదారుల సంఘాల ప్రతినిధి కొడారి వెంకటేష్‌ కోరారు. లోఓల్టేజీ, ట్రాన్స్‌ఫార్మర్లకు కంచె ఏర్పాటు, రైతులకు సక్రమ విద్యుత్‌ సరఫరా, గృహజ్యోతి పథకం అమలు వంటి సమస్యలను పరిష్కరించాలని కోరుతూ ఫోరం సభ్యులకు వినతిపత్రం అందజేశారు. విద్యుత్‌ తీగల కింద మొక్కలు నాటకుండా అధికారులు చర్యలు తీసుకోవాలని సూచించారు.

కార్యక్రమంలో ఫోరం సభ్యులు వి. రమణమూర్తి, కే. శోభారాణి, టి. కోటేశ్వరరావు, వివిధ డివిజన్ల ఇంజనీర్లు రవీందర్‌, వెంకటేశ్వర్లు, సుధీర్‌కుమార్‌, పద్మ, శ్రీకాంత్‌, బాలూనాయక్‌, ఫీర్యా, మోహన్‌, పట్టణ ఏఈ సాయికృష్ణ తదితరులు పాల్గొన్నారు.