గ్రేటర్‌లో అన్ని ఆర్టీసీ బస్సుల్లో పాసులు అనుమతించాలని డిమాండ్‌.

అక్టోబర్‌ 8న బస్సు భవన్‌ ఎదుట ధర్నా

రామన్నపేట, అక్టోబర్‌ 7: వికలాంగులకు ఆర్టీసీ బస్సుల్లో ఉచిత ప్రయాణ సౌకర్యం కల్పించడంతోపాటు గ్రేటర్‌ హైదరాబాద్‌ పరిధిలో నడిచే అన్ని రకాల బస్సుల్లో వికలాంగుల పాసులను అనుమతించాలని ఎన్‌పీఆర్‌డీ జిల్లా ప్రధాన కార్యదర్శి వనం ఉపేందర్‌ డిమాండ్‌ చేశారు. ఈ డిమాండ్ల సాధన కోసం అక్టోబర్‌ 8న హైదరాబాద్‌లోని బస్సు భవన్‌ ఎదుట నిర్వహించనున్న ధర్నాను జయప్రదం చేయాలని పిలుపునిచ్చారు.

రామన్నపేట మండలం ఇంద్రపాలనగరంలో వికలాంగుల హక్కుల జాతీయ వేదిక గ్రామ కమిటీ ఆధ్వర్యంలో సమావేశం నిర్వహించారు. ఎన్‌పీఆర్‌డీ రాష్ట్ర కమిటీ పిలుపు మేరకు చేపట్టనున్న ధర్నాకు సంబంధించిన పోస్టర్‌ను వనం ఉపేందర్‌ ఆవిష్కరించారు.

ఈ సందర్భంగా ఆయన మాట్లాడుతూ.. 2023 అసెంబ్లీ ఎన్నికల సందర్భంగా కాంగ్రెస్‌ పార్టీ అధికారంలోకి వస్తే ఆర్టీసీ బస్సుల్లో వికలాంగులకు ఉచిత ప్రయాణ సౌకర్యం కల్పిస్తామని హామీ ఇచ్చిందన్నారు. ప్రభుత్వం ఏర్పడి 34 నెలలు పూర్తవుతున్నా హామీ అమలుకు నోచుకోలేదని పేర్కొన్నారు. మహిళా వికలాంగులకు ఉచిత ప్రయాణ సౌకర్యం అమల్లోకి వచ్చినప్పటికీ, పురుష వికలాంగులకు కూడా ఈ సదుపాయం కల్పించాల్సి ఉందన్నారు.

జిల్లా స్థాయిలో డీలక్స్‌ బస్సుల్లో వికలాంగుల రాయితీ పాసులను అనుమతిస్తున్నారని, అయితే గ్రేటర్‌ హైదరాబాద్‌ పరిధిలో నడిచే ఎక్స్‌ప్రెస్‌, డీలక్స్‌ బస్సుల్లో పాసులను అనుమతించడం లేదన్నారు. గ్రేటర్‌ పరిధిలో ఆర్డినరీ బస్సులు తక్కువ సంఖ్యలో నడుస్తున్నందున వికలాంగులు తీవ్ర ఇబ్బందులు ఎదుర్కొంటున్నారని తెలిపారు. గ్రేటర్‌లో నడిచే అన్ని రకాల ఆర్టీసీ బస్సుల్లో వికలాంగుల పాసులను అనుమతించాలని డిమాండ్‌ చేశారు.

ఎన్నికల సమయంలో ఇచ్చిన హామీ అమలు కోసం 34 నెలలుగా వికలాంగులు ఆందోళనలు చేస్తున్నా ప్రభుత్వం స్పందించకపోవడం విచారకరమన్నారు. ఉచిత ప్రయాణ సౌకర్యం కల్పించడంతోపాటు అన్ని రకాల ఆర్టీసీ బస్సుల్లో వికలాంగుల పాసులను అనుమతించేలా ప్రభుత్వం చర్యలు తీసుకోవాలని కోరారు. డిమాండ్ల సాధన కోసం అక్టోబర్‌ 8న బస్సు భవన్‌ ఎదుట నిర్వహించే ధర్నాకు వికలాంగులు పెద్ద సంఖ్యలో తరలివచ్చి జయప్రదం చేయాలని పిలుపునిచ్చారు.

నూతన కమిటీ ఎన్నిక

అనంతరం ఇంద్రపాలనగర గ్రామ కమిటీ నూతన కార్యవర్గాన్ని ఎన్నుకున్నారు. గౌరవ అధ్యక్షుడిగా నాగు నరసింహ, అధ్యక్షుడిగా ఒంపు వెంకటేశం, ఉపాధ్యక్షులుగా నూకల వెంకటేశం, ఆది నారాయణ, ప్రధాన కార్యదర్శిగా పెండల శేఖర్‌, సహాయ కార్యదర్శిగా గర్దాస్‌ రవి, మరో సహాయ కార్యదర్శిగా పగడాల లక్ష్మి, కోశాధికారిగా గోకికారి నర్సోజిని ఎన్నుకున్నారు. కమిటీ సభ్యులుగా శివగల రాములు, గర్దాసు నరహరి, రాచకొండ శ్రీకాంత్‌, పగడాల వెంకటేశం తదితరులు ఎన్నికయ్యారు.