మిస్సింగ్‌ కేసులో ఉన్న మహిళగా గుర్తింపు.. హత్యపై కుటుంబ సభ్యుల అనుమానం.

: నాగోల్‌ పోలీస్‌స్టేషన్‌ పరిధిలోని తట్టి అన్నారం సమీపంలో మహిళ మృతదేహం లభించడం కలకలం రేపింది. బుధవారం ఉదయం వాకింగ్‌కు వెళ్లిన వారు మృతదేహాన్ని గుర్తించి పోలీసులకు సమాచారం అందించారు. ఘటనాస్థలానికి చేరుకున్న పోలీసులు మృతదేహాన్ని స్వాధీనం చేసుకుని వివరాలు సేకరించారు.మృతురాలిని మాణికేశ్వర్‌నగర్‌కు చెందిన మంగ (46)గా గుర్తించారు. సెప్టెంబర్‌ 28న ఉదయం ఇంటి నుంచి బయటకు వెళ్లిన మంగ తిరిగి ఇంటికి రాకపోవడంతో కుటుంబ సభ్యులు ఓయూ పోలీస్‌స్టేషన్‌లో మిస్సింగ్‌ ఫిర్యాదు చేశారు. తాజాగా తట్టి అన్నారం సమీపంలో లభించిన మృతదేహం మంగదేనని పోలీసులు నిర్ధారించారు.కాగా, తన తల్లి మృతిపై అనుమానాలు ఉన్నాయని మంగ కుమార్తె జ్యోతి పోలీసులకు తెలిపింది. మిస్సింగ్‌ ఫిర్యాదు సమయంలోనే కొందరిపై అనుమానం వ్యక్తం చేసినట్లు పేర్కొంది. మృతదేహం వద్ద మద్యం సీసాలు లభించినట్లు పోలీసులు తెలిపారు.అయితే మంగ హత్యకు గురైనట్లు ఇప్పటివరకు నిర్ధారణ కాలేదని ఇన్‌చార్జి ఏసీపీ రవీందర్‌రెడ్డి తెలిపారు. మృతికి అసలు కారణం తేల్చేందుకు పోస్టుమార్టం నిర్వహిస్తున్నామని, నివేదిక ఆధారంగా తదుపరి చర్యలు తీసుకుంటామని చెప్పారు. నాగోల్‌ ఇన్‌స్పెక్టర్‌ మక్బూల్‌ జానీ ఆధ్వర్యంలో పోలీసులు అన్ని కోణాల్లో దర్యాప్తు చేస్తున్నారు.