ప్రజా సమస్యలను ఎప్పటికప్పుడు వెలుగులోకి తీసుకువస్తూ ప్రజలకు, ప్రభుత్వానికి మధ్య వారధిగా నిలుస్తున్న పాత్రికేయులను గౌరవిస్తూ జీఎంఆర్ ఫౌండేషన్ ఆధ్వర్యంలో టీయూడబ్ల్యూజే హెచ్-143 మీడియా మిత్రులకు బ్యాగులను పంపిణీ చేశారు. నారాయణఖేడ్ నియోజకవర్గ మీడియా మిత్రుల కార్యవర్గ సమావేశం సందర్భంగా ఈ కార్యక్రమం నిర్వహించారు. జీఎంఆర్ ఫౌండేషన్ చైర్మన్, బీఆర్‌ఎస్ పార్టీ నాయకులు గుఱ్ఱపు మచ్చేందర్ ఆదేశాల మేరకు బ్యాగులను అందజేశారు. ఈ సందర్భంగా గ్రామీణ ప్రాంతాల్లో ప్రజలు ఎదుర్కొంటున్న సమస్యలను అధికారుల దృష్టికి తీసుకెళ్లడంలో పాత్రికేయుల పాత్ర ఎంతో కీలకమని, సమాజంలో జరుగుతున్న విషయాలను ప్రజలకు చేరవేయడంలో వారి సేవలు అభినందనీయమని ఫౌండేషన్ సభ్యులు తెలిపారు. పాత్రికేయుల సంక్షేమానికి తమ వంతు సహాయ సహకారాలు అందిస్తామని పేర్కొన్నారు. బ్యాగులు అందుకున్న మీడియా మిత్రులు గుఱ్ఱపు మచ్చేందర్‌కు కృతజ్ఞతలు తెలిపారు. కార్యక్రమంలో జీఎంఆర్ ఫౌండేషన్ సభ్యులు, టీయూడబ్ల్యూజే హెచ్-143 కార్యవర్గ సభ్యులు, నారాయణఖేడ్ నియోజకవర్గ పాత్రికేయులు తదితరులు పాల్గొన్నారు.