దిల్‌సుఖ్‌నగర్‌: చైతన్యపురి డివిజన్‌ పరిధిలోని భవానీనగర్‌ కాలనీలో ఉన్న శ్రీ సంతోషిమాత ఆలయాన్ని మల్కాజిగిరి ఎంపీ ఈటల రాజేందర్‌ శుక్రవారం సందర్శించారు. ఇటీవల అమ్మవారి విగ్రహంపై జరిగిన దాడి ఘటనకు సంబంధించిన వివరాలను ఆలయ అర్చకులు, స్థానికులను అడిగి తెలుసుకున్నారు. ఆయన వెంట గడ్డిఅన్నారం డివిజన్‌ తాజా మాజీ బీజేపీ కార్పొరేటర్‌ బద్దం ప్రేమ్‌ మహేశ్వర్‌రెడ్డి ఉన్నారు.

ఈ సందర్భంగా ఈటల రాజేందర్‌ మాట్లాడుతూ.. సంతోషిమాత ఆలయంలో జరిగిన ఘటనను తీవ్రంగా ఖండించారు. అర్చకులు, భక్తుల సమక్షంలో గర్భగుడిలోకి ప్రవేశించి అమ్మవారి విగ్రహంపై దాడికి పాల్పడటం గర్హనీయమన్నారు. స్థానికులు నిందితుడిని పట్టుకుని పోలీసులకు అప్పగించారని తెలిపారు. ఆలయ పవిత్రతకు భంగం కలిగించిన వ్యక్తిపై కఠిన చర్యలు తీసుకోవాలని డిమాండ్‌ చేశారు.

దేవాలయాల భద్రత విషయంలో ప్రభుత్వం తక్షణమే చర్యలు చేపట్టాలని, ఇలాంటి ఘటనలు పునరావృతం కాకుండా ప్రత్యేక చర్యలు తీసుకోవాలని కోరారు.

బద్దం ప్రేమ్‌ మహేశ్వర్‌రెడ్డి మాట్లాడుతూ.. ఘటనపై ఎంపీ ఈటల రాజేందర్‌ స్పందించి ఆలయాన్ని సందర్శించడం పట్ల కృతజ్ఞతలు తెలిపారు. ఆలయ పవిత్రతను కాపాడేందుకు ప్రభుత్వం సమగ్ర విచారణ జరిపి బాధ్యులపై చట్టపరమైన చర్యలు తీసుకోవాలని కోరారు.

కార్యక్రమంలో బీజేపీ నాయకులు, కార్యకర్తలు, ఆలయ అర్చకులు, భక్తులు, స్థానికులు పాల్గొన్నారు.