స్త్రీనిధి క్రెడిట్ ఫెడరేషన్ పాలకవర్గ ఎన్నికల్లో సంగారెడ్డి, మెదక్ ఉమ్మడి జిల్లాల డైరెక్టర్‌గా ఘన విజయం సాధించిన హీనా బేగంను నారాయణ్‌ఖేడ్ ఎమ్మెల్యే డాక్టర్ పట్లోళ్ల సంజీవరెడ్డి తన నివాసంలో ఘనంగా సన్మానించారు. ఈ సందర్భంగా ఆమెకు శాలువా కప్పి, పుష్పగుచ్ఛం అందించి అభినందనలు తెలిపారు. అనంతరం ఎమ్మెల్యే మాట్లాడుతూ మహిళల ఆర్థిక స్వావలంబనకు స్త్రీనిధి సంస్థ ఎంతో కీలకంగా పనిచేస్తోందని, మహిళా స్వయం సహాయక సంఘాలకు ఆర్థిక బలం చేకూర్చడంలో ఈ సంస్థ విశేష పాత్ర పోషిస్తోందన్నారు. ఉమ్మడి జిల్లా డైరెక్టర్‌గా హీనా బేగం ఎన్నిక కావడం అభినందనీయమని, మహిళా సంఘాల అభివృద్ధి, మహిళలకు రుణాలు సకాలంలో అందేలా మరింత బాధ్యతతో పనిచేయాలని సూచించారు. నియోజకవర్గంలోని మహిళల ఆర్థికాభివృద్ధికి తన పూర్తి సహకారం ఎల్లప్పుడూ ఉంటుందని భరోసా ఇచ్చారు.హీనా బేగం మాట్లాడుతూ తన విజయానికి సహకరించిన సంగారెడ్డి, మెదక్ ఉమ్మడి జిల్లాల మహిళా సంఘాల ప్రతినిధులకు కృతజ్ఞతలు తెలిపారు. ఎన్నికల్లో తనకు అండగా నిలిచిన ఎమ్మెల్యే డాక్టర్ పట్లోళ్ల సంజీవరెడ్డికి ప్రత్యేక ధన్యవాదాలు తెలియజేస్తూ, ఆయన మార్గదర్శకత్వంలో మహిళల సంక్షేమం కోసం, స్త్రీనిధి పథకాల ప్రయోజనాలు ప్రతి అర్హ మహిళకు చేరేలా అంకితభావంతో పనిచేస్తానని తెలిపారు.ఈ సన్మాన కార్యక్రమంలో మున్సిపల్ వైస్ చైర్మన్ దారం శంకర్, మాజీ ఎంపీటీసీ పండరెడ్డి, కాంగ్రెస్ పార్టీ సీనియర్ నాయకుడు రహీం, స్థానిక నాయకుడు గౌస్ చిస్తి,పార్టీ నాయకులు, మహిళా సంఘాల ప్రతినిధులు తదితరులు పాల్గొన్నారు.