శ్రీ సత్యసాయి జిల్లా ఎస్పీ ఆదేశాల మేరకు జిల్లా వ్యాప్తంగా మహిళలు, బాలికలు, చిన్నారుల భద్రతకు అత్యంత ప్రాధాన్యత ఇస్తూ అన్ని సబ్‌డివిజన్‌ల పరిధిలోని పాఠశాలలు, కళాశాలలు మరియు గ్రామాలలో శక్తి టీం ఆధ్వర్యంలో విస్తృత అవగాహన కార్యక్రమాలు నిర్వహించారు.

ఈ సందర్భంగా విద్యార్థినులు, విద్యార్థులు, మహిళలకు శక్తి యాప్ వినియోగంపై అవగాహన కల్పించారు. అత్యవసర పరిస్థితుల్లో మహిళలు, బాలికలు వెంటనే పోలీసుల సహాయం పొందేందుకు శక్తి యాప్ ఎలా ఉపయోగపడుతుందో సులభంగా వివరించారు.

అదేవిధంగా సైబర్ నేరాలు, ఆన్‌లైన్ మోసాలు, ఫేక్ లోన్ యాప్‌లు, బ్యాంకింగ్ మోసాలు, ఓటీపీ, వ్యక్తిగత వివరాలను ఇతరులతో పంచుకోకూడదనే అంశాలపై ప్రజలను అప్రమత్తం చేశారు.

బాల్య వివాహాల దుష్పరిణామాలు, పోక్సో (POCSO) చట్టం, మహిళలు మరియు చిన్నారులపై జరిగే నేరాలు, వాటిపై అమలులో ఉన్న చట్టాలు, నేరాల నివారణలో ప్రతి ఒక్కరి బాధ్యత గురించి శక్తి టీం సభ్యులు సమగ్రంగా వివరించారు.

అలాగే అత్యవసర పరిస్థితుల్లో వినియోగించాల్సిన హెల్ప్‌లైన్ నంబర్లపై అవగాహన కల్పిస్తూ..

పోలీస్ అత్యవసర సేవలు – 100 / 112

మహిళల హెల్ప్‌లైన్ – 181

అగ్నిమాపక సేవలు – 101

సైబర్ మోసాల ఫిర్యాదుల కోసం – 1930

బాలల సహాయ నంబర్ – 1098

గురించి ప్రజలకు వివరించారు.

ఈ కార్యక్రమంలో గ్రామ ప్రజలు, మహిళలు, యువత, విద్యార్థులు ఉత్సాహంగా పాల్గొని శక్తి టీం సభ్యులు అందించిన సూచనలు, భద్రతా మార్గదర్శకాలను శ్రద్ధగా విన్నారు.

ప్రజల భద్రత, మహిళల రక్షణ, చిన్నారుల సంక్షేమం కోసం ఇటువంటి అవగాహన కార్యక్రమాలు జిల్లా వ్యాప్తంగా నిరంతరం కొనసాగుతాయని శక్తి టీం సభ్యులు తెలిపారు.