రూ.60 వేల విలువైన 118 కిలోల కుళ్లిన, ఎక్స్‌పైరీ ఆహార పదార్థాలు ధ్వంసం.

యాదాద్రి భువనగిరి: భువనగిరిలోని రిలయన్స్‌ రిటైల్‌ లిమిటెడ్‌ సూపర్‌ మార్కెట్‌లో ఫుడ్‌సేఫ్టీ అధికారులు ఆకస్మిక తనిఖీలు నిర్వహించారు. తనిఖీల్లో ఫుడ్‌సేఫ్టీ నిబంధనల ఉల్లంఘనలు గుర్తించిన అధికారులు సంస్థకు ఫుడ్‌ సేఫ్టీ అండ్‌ స్టాండర్డ్స్‌ చట్టంలోని సెక్షన్‌ 32(1)(a) కింద ఇంప్రూవ్‌మెంట్‌ నోటీసు జారీ చేశారు.

స్టోర్‌లో కుళ్లిన కూరగాయలు, పండ్లు, ఎక్స్‌పైరీ ఆహార పదార్థాలతో పాటు లేబులింగ్‌లో లోపాలను అధికారులు గుర్తించారు. పరిశుభ్రత, పెస్ట్‌ కంట్రోల్‌, సిబ్బంది ఫిట్‌నెస్‌ సర్టిఫికెట్లు, తప్పనిసరి రికార్డుల నిర్వహణలోనూ లోపాలు ఉన్నట్లు వెల్లడించారు. దీంతో సుమారు రూ.60 వేల విలువైన 118 కిలోల కుళ్లిన కూరగాయలు, పండ్లు, ఎక్స్‌పైరీ ఫుడ్‌ ప్రొడక్ట్స్‌ను అధికారులు ధ్వంసం చేశారు.

నిర్ణీత గడువులోగా గుర్తించిన లోపాలను సరిదిద్దుకోవాలని అధికారులు సంస్థ యాజమాన్యాన్ని ఆదేశించారు. నిబంధనలు పాటించడంలో విఫలమైతే ఫుడ్‌ లైసెన్స్‌ రద్దు చేస్తామని అసిస్టెంట్‌ ఫుడ్‌ కంట్రోలర్‌ వి. జ్యోతిర్మయి హెచ్చరించారు.