తెలంగాణలో హోలీ పండుగను ప్రశాంతంగా మరియు సురక్షితంగా జరుపుకునేలా ప్రత్యేక చర్యలు తీసుకుంటున్నట్లు హైదరాబాద్ పోలీస్ కమిషనర్ సజ్జనార్ తెలిపారు.హైదరాబాద్ కమిషనరేట్ పరిధిలో ఈ నెల 3వ తేదీ ఉదయం 6 గంటల నుండి సాయంత్రం 6 గంటల వరకు అన్ని మద్యం దుకాణాలు మూసివేయాలని ఆదేశాలు జారీ చేశారు. మద్యం షాపులతో పాటు కల్లు దుకాణాలు, బార్లు, రెస్టారెంట్లలో కూడా మద్యం విక్రయాలపై ఆంక్షలు అమలు చేయనున్నారు.హోలీ సందర్భంగా ఎలాంటి అవాంఛనీయ సంఘటనలు జరగకుండా పోలీస్ శాఖ కట్టుదిట్టమైన భద్రతా ఏర్పాట్లు చేసింది. బహిరంగ ప్రదేశాల్లో పాదచారులు, వాహనదారులపై బలవంతంగా రంగులు చల్లరాదని సూచించారు. అలాగే మహిళల పట్ల అసభ్యంగా ప్రవర్తించే వారిపై కఠిన చర్యలు తీసుకుంటామని హెచ్చరించారు. ఈ నేపథ్యంలో షీ టీమ్స్ ప్రత్యేక నిఘా నిర్వహిస్తాయని తెలిపారు.ప్రజలు హోలీ పండుగను సంతోషంగా, కానీ బాధ్యతతో జరుపుకోవాలని, శాంతి భద్రతలకు సహకరించాలని సీపీ సజ్జనార్ విజ్ఞప్తి చేశారు.