అఖిల భారత రైతు సంఘం 36వ జాతీయ మహాసభలను విజయవంతం చేయాలని రైతు సంఘం రాష్ట్ర నాయకులు బుర్రి శ్రీరాములు పిలుపునిచ్చారు. శనివారం మునగాలలోని సుందరయ్య భవనంలో చందా చంద్రయ్య అధ్యక్షతన జరిగిన మండల కమిటీ సమావేశంలో ఆయన మాట్లాడుతూ, నవంబర్ 15 నుంచి 18 వరకు నల్గొండలో జరిగే మహాసభలకు మండలం నుంచి 2 వేల మంది రైతులను సమీకరించాలని తెలిపారు. నవంబర్ 5 నుంచి గ్రామాల్లో ప్రచారం నిర్వహించి రైతులకు మహాసభల లక్ష్యాలను వివరించాలన్నారు. వర్షపాతం లోటుతో ఎండిపోయిన వరి, పత్తి తదితర పంటలకు ఎకరాకు రూ.25 వేల నష్టపరిహారం చెల్లించి రైతులను ఆదుకోవాలని కేంద్ర, రాష్ట్ర ప్రభుత్వాలను డిమాండ్ చేశారు. ఈ సమావేశంలో రైతు సంఘం మండల కార్యదర్శి దేశిరెడ్డి స్టాలిన్‌రెడ్డి, సీఐటీయూ మండల కన్వీనర్ బచ్చలకూర స్వరాజ్యం, నాగిరెడ్డి, సంతోష్ తదితరులు పాల్గొన్నారు.