చంపాపేట, అక్టోబర్ 18: బతుకమ్మ సంబరాల్లో వినూత్న ఆలోచనతో రూపొందించిన తులసి కోట ఆకారపు బతుకమ్మ ప్రత్యేక ఆకర్షణగా నిలిచింది. చంపాపేట డివిజన్ పరిధిలోని మాధవ్ నగర్ కాలనీలో ఆదివారం నిర్వహించిన బతుకమ్మ వేడుకల్లో మహిళలు తులసి కోట ఆకృతిలో బతుకమ్మను పేర్చి తమ సృజనాత్మకతను చాటుకున్నారు.

తంగేడు, గునుగు, బంతి, చామంతి తదితర రంగురంగుల పూలతో తులసి కోట బతుకమ్మను అందంగా తీర్చిదిద్దారు. కాలనీ మహిళలు సంప్రదాయ దుస్తులు ధరించి, బతుకమ్మ చుట్టూ తిరుగుతూ పాటలు పాడి ఉత్సాహంగా వేడుకల్లో పాల్గొన్నారు. వినూత్నంగా రూపొందించిన బతుకమ్మను తిలకించేందుకు చుట్టుపక్కల ప్రాంతాల ప్రజలు తరలివచ్చారు. మహిళల సమష్టి కృషి, సృజనాత్మకతను స్థానికులు అభినందించారు.