రామన్నపేట: మండల కేంద్రంలో నిర్వహిస్తున్న ప్రజావాణి, గ్రీవెన్స్‌ డే కార్యక్రమాలను మండల ప్రజలు సద్వినియోగం చేసుకోవాలని ఎంపీడీవో ఆవుల రాములు సూచించారు. గ్రామాల్లో నెలకొన్న సమస్యలను అధికారుల దృష్టికి తీసుకువస్తే సంబంధిత శాఖలతో సమన్వయం చేసి పరిష్కరించేందుకు చర్యలు తీసుకుంటామని తెలిపారు.

మండల కేంద్రంలో నిర్వహించిన ప్రజావాణిలో ప్రజల నుంచి ఆరు ఫిర్యాదులు స్వీకరించినట్లు ఎంపీడీవో తెలిపారు. ఎంఆర్‌ఓ లాల్‌బహదూర్‌ 2, ఎంపీఓ ఎండీ 2, ఆర్‌డబ్ల్యూఎస్‌ ఏఈఈ 1, పీఆర్‌ ఏఈఈ సందీప్‌రెడ్డి 1 ఫిర్యాదులను స్వీకరించారు. సమస్యలను పరిశీలించి వెంటనే పరిష్కరించాలని సంబంధిత అధికారులను ఎంపీడీవో ఆదేశించారు.

అయితే సెప్టెంబర్‌ 28న నిర్వహించిన ప్రజావాణి కార్యక్రమానికి ముగ్గురు అధికారులు గైర్హాజరైన విషయాన్ని కలెక్టర్‌ దృష్టికి తీసుకెళ్లేందుకు లేఖ రాసినట్లు ఎంపీడీవో తెలిపారు. ప్రజలు తమ సమస్యల పరిష్కారం కోసం గ్రీవెన్స్‌ డేలో వినతులు సమర్పించాలని కోరారు.

కార్యక్రమంలో ఎంఏఓ ఎజాజ్‌ అహ్మద్‌ఖాన్‌, ఎంఈఓ సురేందర్‌రెడ్డి, ఎంఓ బేబీ శాలిని, ఏఈలు, అంగన్‌వాడీ సూపర్‌వైజర్లు తదితరులు పాల్గొన్నారు.