మునగాల మండల పరిధిలోని నారాయణగూడెం గ్రామపంచాయతీ ఆవరణంలో బుధవారం అరుణ కంటి హాస్పిటల్, సూర్యాపేట వారి ఆధ్వర్యంలో ఉచిత కంటి వైద్య శిబిరాన్ని నిర్వహించారు. ఈ సందర్భంగా గ్రామానికి చెందిన పలువురు ప్రజలకు వైద్యులు కంటి పరీక్షలు నిర్వహించి, కంటి సమస్యలపై అవగాహన కల్పించారు.

శిబిరంలో కంటి చూపు సమస్యలు, ఇతర కంటి సంబంధిత సమస్యలను పరీక్షించి అవసరమైన వారికి వైద్య సలహాలు అందించారు. అలాగే, గ్రామస్తులకు తక్కువ ధరకే నాణ్యమైన కంటి అద్దాలను అందుబాటులో ఉంచారు. కంటి ఆపరేషన్ అవసరమున్న వారిని గుర్తించి, తదుపరి చికిత్స కోసం అరుణ కంటి హాస్పిటల్‌లో వైద్య సేవలు పొందాలని సూచించారు.

గ్రామీణ ప్రాంత ప్రజలకు ఇటువంటి ఉచిత వైద్య శిబిరాలు ఎంతగానో ఉపయోగపడతాయని నిర్వాహకులు తెలిపారు. భవిష్యత్తులో కూడా ప్రజల ఆరోగ్య అవసరాలను దృష్టిలో ఉంచుకుని మరిన్ని వైద్య సేవా కార్యక్రమాలు నిర్వహించేందుకు కృషి చేస్తామని పేర్కొన్నారు.

ఈ కార్యక్రమంలో గ్రామ సర్పంచ్ కాంపాటి వెంకట్, పంచాయతీ సెక్రటరీ, అరుణ,కంటి హాస్పిటల్ వైద్య సిబ్బంది, గ్రామపంచాయతీ సిబ్బంది తదితరులు పాల్గొన్నారు.