ప్రధాని నరేంద్ర మోదీ 25 ఏళ్ల రాజకీయ ప్రస్థానం స్ఫూర్తిదాయకమని బీజేపీ రాష్ట్ర ఉపాధ్యక్షుడు కాసం వెంకటేశ్వర్లు అన్నారు. భువనగిరి పట్టణంలోని జగ్జీవన్‌రామ్‌ విగ్రహం వద్ద బీజేపీ జిల్లా అధ్యక్షుడు ఊట్కూరు అశోక్‌గౌడ్‌ అధ్యక్షతన ‘సేవా సంకల్ప్‌ అభియాన్‌’లో భాగంగా వికసిత్‌ భారత్‌ సంకల్ప సభ, సేవా జ్యోతి యాత్ర నిర్వహించారు. ఈ సందర్భంగా వెంకటేశ్వర్లు, బీజేపీ రాష్ట్ర ప్రధాన కార్యదర్శి వేముల అశోక్‌ జ్యోతి ప్రజ్వలన చేశారు.

అనంతరం ప్రధాని మోదీ ప్రసంగాన్ని కార్యకర్తలతో కలిసి ప్రత్యక్ష ప్రసారం ద్వారా వీక్షించారు. కాసం వెంకటేశ్వర్లు మాట్లాడుతూ.. 2001లో గుజరాత్‌ సీఎంగా మోదీ ప్రారంభించిన రాజకీయ ప్రస్థానం 2014లో ప్రధానమంత్రి స్థాయికి చేరిందన్నారు. 2019, 2024లోనూ ప్రజల మద్దతుతో ప్రధానిగా కొనసాగారని తెలిపారు.

జన్‌ధన్‌, స్వచ్ఛ భారత్‌, ఉజ్వల, డిజిటల్‌ ఇండియా, మేక్‌ ఇన్‌ ఇండియా వంటి కార్యక్రమాలతోపాటు జీఎస్టీ, ఆర్టికల్‌ 370, అయోధ్య రామమందిర నిర్మాణం, కోవిడ్‌ సమయంలో చేపట్టిన చర్యలు, జీ20 సదస్సు వంటి అంశాలను ఆయన ప్రస్తావించారు. 2047 నాటికి వికసిత్‌ భారత్‌ సాధించేందుకు ప్రతి కార్యకర్త ప్రజల మధ్య ఉండి ప్రభుత్వ పథకాలను వివరించాలని పిలుపునిచ్చారు.

అనంతరం పట్టణంలో సేవా జ్యోతి ర్యాలీ నిర్వహించారు. కార్యక్రమంలో మాజీ జిల్లా అధ్యక్షుడు పాశం భాస్కర్‌, రాష్ట్ర కార్యవర్గ సభ్యులు, జిల్లా నాయకులు, వివిధ మోర్చాల అధ్యక్షులు, మండల అధ్యక్షులు, పార్టీ నాయకులు, కార్యకర్తలు పాల్గొన్నారు.